La controlla da finanzas federala EFK crititgescha la surdada da subvenziuns. Ella ha examinà ed analisà tge subvenziuns che portian l'effect giavischà. En in rapport vegn la EFK a la conclusiun che las subvenziuns sajan anc memia pauc focusadas sin lur finamiras ed uschia saja grev d'examinar l'effect. Ella ha examinà 36 rapports davart subvenziuns en l'agricultura, en il traffic public u ovras socialas sco AVS u AI.
Tenor la EFK dettia era puncto rentabilitad bler potenzial d'optimar ils pajaments da subvenziun. Igl haja dà cas, nua ch'investiziuns sajan vegnidas sustegnidas cun subvenziuns, che fissan – uschè u uschia – era vegnidas realisadas senza ils daners publics. Sco exempel numna la EFK ils implants solars. Perquai propona la EFK da rinforzar la surveglianza.
