Chantuns, vischnancas, manaschis e chasadas privatas survegnan tuts subvenziuns. L'onn 2022 ha la Confederaziun dà ora 48,5 milliardas francs per las subvenziuns.
Savens giajan las subvenziuns là nua ch'i na duvrass gnanc agid finanzial supplementar, crititgescha la Controlla federala da finanzas. En ses rapport constatescha ella era che la finamira da las subvenziuns na saja savens betg definida cler, u betg cler avunda. Uschia saja grev da controllar l'effect da las subvenziuns.
Auzà cuntinuadamain summa da subvenziuns
Vinavant scriva la Controlla federala da finanzas en ses rapport che la Confederaziun haja auzà cuntinuadamain la summa da subvenziuns – quai dapi mez dal 20avel tschientaner. Per che quels daners vegnian repartids pli gist, recumonda ella ina controlla pli rigurusa.
L'Administraziun federala da finanzas veglia realisar las mesiras necessarias a temp, hai gì num en ina posiziun generala. I sa tractia per exempel da far pli conscient ils uffizis da la rentabilitad da las subvenziuns.
Cun subvenziuns sustegna la Confederaziun activitads ordaifer l'administraziun federala ch'han u ina finamira sociala u ina finamira politica – e che fissan strusch pussaivlas senza sustegn dal stadi.
