Las medias publicas èn savens exponidas a la reproscha ch’ellas impedeschian u schizunt stgatschian las medias privatas sin il martgà. Questa tesa da «crowding-out» daventa adina pli impurtanta, perquai che numerusas purschidas d’infurmaziun concurrenzeschan per l’attenziun da las abunentas ed ils abunents che pajan. En l’ediziun da las Annalas qualitad da las medias 2024 ha il Center da perscrutaziun publicitad e societad (Fög) da l'Universitad da Turitg examinà questa tesa a maun da las datas d’ina retschertga standardisada e represchentativa ch’è vegnida realisada en il rom dal Reuters Institute News Report 2024 da l’Universitad dad Oxford per la Svizra tudestga e la Svizra romanda.
Las medias publicas vegnan duvradas cumplementarmain a medias privatas
L'evaluaziun da las datas mussa che las utilisadras ed ils utilisaders da la SRG SSR consumeschan offline ed online pli savens medias d'abunament (61%) che persunas che na fan betg diever da las purschidas d'infurmaziun da la SRG SSR (38%). Era medias pendularas e da boulevard vegnan consumadas sin tut ils chanals pli savens d'utilisadras e d'utilisaders da la SRG SSR (75%) che da persunas che na nizzegian betg purschidas da la SRG SSR (58%).
Quai valia era per il sectur online. Be var 4% da tut las persunas dumandadas consumeschan exclusivamain novitads online da la SRG SSR. Quai è bler pli pauc che la cumpart da las persunas dumandadas che dovra online unicamain medias pendularias e boulevard (26%) u exclusivamain medias abunadas (8%).
La populaziun svizra na fa damai per gronda part betg diever exclusiv da las purschidas d’infurmaziun da SRF e RTS, mabain cumplementarmain a quellas dals purschiders d’infurmaziuns privats.
In connex statistic tranter l’utilisaziun da tscherts tips da medias e la prontadad da pajar n’è betg vegnì constatà. «Sch’i vegn pajà per novitads online u betg, dependa plitost da las preferenzas e dals tratgs sociodemografics da las persunas interrogadas», uschia Eisenegger. «Umens e persunas pli giuvnas pajan plitost. E tgi che s’interessescha fermamain per novitads e politica è plitost pront da dar ora daners per purschidas digitalas da novitads.»
Dumandà ina transparenza tar l'applicaziun da l'intelligenza artifiziala en il schurnalissem
In ulteriur studi en l’annuari mussa che la populaziun è anc adina sceptica envers il diever da l’intelligenza artifiziala (IA) en il schurnalissem – e quai en in temp che las chasas da medias svizras dovran l’IA en il fratemp en blers secturs. Quasi trais quarts da las Svizras e dals Svizzers valiteschan las ristgas da l'IA en il schurnalissem sco grondas e pli autas ch'en auters secturs da la societad sco la politica u il militar. En quest connex vala: dapli che l’IA intervegna directamain en il product schurnalistic, per exempel en la producziun da texts u da maletgs, e pli gronda che la sceptica è. L’applicaziun da l’IA per translaziuns, analisas da datas u per retschertgas vegn percunter sustegnida per gronda part. Bleras persunas interrogadas spetgan transparenza da las medias tar l'applicaziun da l'IA e giavischan ina publicaziun detagliada per tut las contribuziuns e tut ils pass da lavur, nua che l'IA è vegnida duvrada. Mo ina minoritad da las persunas interrogadas (21%) è da l'avis che las medias svizras giajan enturn cun responsabladad cun l'IA.
Schurnalissem cun difficultads da derasaziun
Analisas supplementaras da lunga durada en l’annuari mussan: La qualitad da bleras medias svizras è en general anc adina buna, era sch’ella è sa diminuida levamain en cumparegliaziun cun l’onn precedent. Dentant è la quota dals uschenumnads «News-Deprivierte», pia da persunas che na consumeschan pauc u insumma betg novitads, l’onn 2024 tar 46% (+3 puncts procentuals cumpareglià cun l’onn precedent) da la populaziun svizra.
Las medias svizras n’han nagin problem da qualitad, mabain in problem da la derasaziun, pertge adina dapli Svizras e Svizzers consumeschan be paucas u insumma naginas novitads.
Ultra da quai resta la situaziun finanziala dal schurnalissem precara. Ina consequenza è la concentraziun dal cuntegn che crescha, q.v.d. l'utilisaziun multipla da contribuziuns identicas da las medias. En ils rapports regiunals, ch'eran fin ussa vegnids schanegiads per gronda part da quai, è l'utilisaziun multipla en differentas medias s'augmentada per l'emprima giada fermamain en cumparegliaziun cun l'onn precedent. Perquai ch'i dat sin plaun regiunal e local savens mo paucas purschidas d'infurmaziun actualas, fiss in'ulteriura perdita da la diversitad problematica.
Recumandaziuns per rinforzar il sistem da medias da la Svizra
Las analisas da las annalas 2024 mussan quant ferm ch’il schurnalissem è sut squitsch da las midadas digitalas e dal regress d’entradas tradiziunalas. Il pensar da concurrenza tranter las medias da novitads privatas e publicas n'è dentant betg necessari, mussan las retschertgas. «Il squitsch sin las medias svizras da novitads vegn surtut da l’exteriur, numnadamain da las plattafurmas da tecnologia globalas ch'exploteschan ina gronda part dals retgavs da reclama online», di Eisenegger. «En vista a quest fatg duessan vegnir extendidas las cooperaziuns tranter las medias privatas e publicas.» Quella possia rinforzar la posiziun dal sistem da medias svizzer envers las plattafurmas da tecnologia e da nov er envers ils purschiders d'IA e promover il svilup d'innovaziuns per l'entira branscha.
