La qualitad da las medias svizras è sa meglierada l’onn passà. Ella saja schizunt sin il pli aut nivel dapi 10 onns. A questa conclusiun vegnan las analisas davart la qualitad da las medias da l’Universitad da Turitg – publitgadas en las «Annalas qualitad da las medias 2023».
Contribuì al bun resultat hajan il 2022 surtut ils temas corona e guerra en l’Ucraina, scriva l’universitad en ina communicaziun. Cun quests temas s’augmentia la relevanza dals rapports, sco gia ils onns avant.
Las purschidas online da la SSR
Cumpareglià ha il studi era las prestaziuns da qualitad da las paginas d’internet da la SSR il 2022. E la purschida da RTR vegn valitada sco tuttina auta, quai che reguarda la relevanza e la professiunalitad – cun ils pli gronds portals da la SSR sco srf.ch, rts.ch ed rsi.ch. Tenor il studi ha la sparta «novitads» sin rtr.ch mussà in svilup positiv, cumpareglià cun l’onn 2021. Là vegnia dà dapli paisa a las atgnas contribuziuns.
Co Svizras e Svizzers van per novitads
Il trend da consumar a moda digitala novitads cuntinuescha, resulta d'ina autra part da las retschertgas da l'universitad da Turitg. Per passa in terz da las persunas dumandadas èn paginas d’internet ubain apps da novitads la funtauna principala per s’infurmar. Persunas tranter 18 e 24 onns van cunzunt sin social media per novitads, e las persunas sur 55 onns nizzegian preferidamain la televisiun.
Creschì è era il dumber da las persunas che na s’interessan betg per novitads. 42,7% da la populaziun na taidlan, legian u guardan strusch pli novitads. Sulettamain 11,8% èn da l’avis che medias publicas sajan per la societad plitost ubain dal tut nunimpurtantas.