Igl è ina lescha a la quala ins stoppia dir Gea è Anna Giacometti persvadida. Per la cussegliera naziunala grischuna da la Partida liberaldemocratica èsi ina schlanca lescha che na cuntegna betg scumonds u taglias ma 3,2 milliardas francs per promover privats e firmas da vegnir davent da gas ed ieli.
Era il cusseglier naziunal da la Partida socialdemocratica, Jon Pult, s’engascha per in Gea. La lescha vul era promover firmas innovativas. Quai dettia era perspectivas ad interpresa surtut en il spazi alpin sco il Grischun.
3,2 milliardas
En tut stattan a disposiziun 2 milliardas francs sur 10 onns per persunas privatas che midan ils stgaudaments dad ieli, da gas ed electrics cun stgaudaments pli favuraivels al clima. Per firmas stattan a disposiziun 1,2 milliardas sur 6 onns per innovaziuns e per la midada da producziun sin tecnologias persistentas.
L'opposiziun
Per la Partida populara svizra na va quest quint dentant betg si. La partida ch'è sco unica en l’opposiziun encunter la lescha admonescha ch'in Gea procuria per ina pli gronda mancanza d’energia e pli auts custs d’electricitad. La cussegliera naziunala Magdalena Martullo-Blocher crititgescha fermamain la lescha elavurada dal parlament. La lescha na saja betg realistica gnanc dal temp da realisaziun.
In argument ch'aderentas ed aderents da la lescha na laschan dentant betg vegliar. I na saja tschintg avant las 12 mabain in avant las 12, di la cussegliera naziunala Sandra Locher-Benguerel. La socialdemocrata di ch'i na dettia nagin mussament ch'i custia dapli. Dentant dettia quai ina pluna studis che mussan che far nagut custia anc bler dapli. Ils donns ch'il stgaudament dal clima portan, gist en il spazi alpin, sajan in toc pli chars. Perquai saja uss dad agir per evitar quels custs.
