Igl è l’emprim cumbat da votaziuns per il nov cusseglier federal Albert Rösti. Gist quel sto el far encunter l’atgna partida: la Partida populara svizra. Il nov minister d’ambient ed energia ha preschentà il venderdi ils arguments dal Cussegl federal e dal parlament per in Gea a la lescha davart la protecziun dal clima. «La lescha na cuntegna betg scumonds e taglias e sa differenziescha uschia dad anteriurs projects», uschia Rösti.
Sia collega da partida, la cussegliera naziunala grischuna Magdalena Martullo che sesa en il comité encunter la lescha, na craja quai betg e cumbatta quella – tenor ella ina lescha che maglia electricitad vehementamain. Las finamiras na sajan betg cuntanschiblas en quel temp ch’ins duess cuntascher quai e perquai na vai a la fin senza scumondsm, è ella persvasa. Perquai è la lescha tenor Martullo in pachet da manzegnas.
Cumbat intern
La Partida populara svizla ha fatg il referendum cunter la lescha. En il comité seseva quella giada er anc Albert Rösti sez. Entant che la PPS ha tramess curt suenter la conferenza da pressa dad oz in mail cun il titel «cusseglier federal Rösti na di betg il medem sco cusseglier naziunal Rösti», vesa el quai plitost pragmatic ed ha confermà davant las medias da defender la lescha, saja quai en intervistas sco era tar occurrenzas.
3,2 Milliardas per privats e firmas
La lescha è vegnida fatga en il parlament sco cuntraproposta a l’iniziativa da vadretgs. La lescha vul promover l'energia regenerabla e mesiras per la protecziun dal clima. Tgi che mida or stgaudaments dad ieli, gas u electricitad cun variantas pli favuraivlas al clima survegn sustegn finanzial. A disposiziun stattan dus milliardas francs per en tut 10 onns. Uschia duain er firmas vegnir sustegnidas per tecnologias innovativas cun 1,2 milliardas en tut.
Importar pli pauc
Radund trais quarts da l'energia importa la Svizra da l'exteriur, quella dependenza vulan ins reducir fermamain. En il parlament vegn lavurà vi dad in grond project per promover energias regenerablas indigenas. Quellas duain er pudair cuvernar lura l’electricitad surpli ch'i vul. Ina finamira illusorica tenor la cussegliera naziunala grischuna Magdalena Martullo: «Nus vegnin ad avair memia pauca electricitad», di ella. E quella vegn lura bler pli custaivla ed en general manca in plan al Cussegl federal, agiunta Martullo. Cusseglier federal Rösti ha però in plan: en il visier ils stgaudaments electrics che dovran 10% da tut l'energia che nus duvrain d’enviern – tant sco che l’ovra atomara da Mühleberg produciva en in onn.
Che la sfida è gronda ed il cumbat in cunter il temp, da quel avis èn omadus. Il cumbat da votaziun ha ussa en mintga cas cumenzà – ed è uss gia electrisà.
