Dapi il november applitgescha il center federal per requirents d’asil a Turitg la nova procedura da 24 uras. Quella prevesa che requirents d’asil or da stadis sco l’Algeria, il Maroc u la Tunesia survegnan aifer 24 uras ina decisiun d’asil.
Tenor il Secretariat da stadi per la migraziun è il dumber da dumondas d'asil da persunas or da quests pajais sa reducidas per 70 pertschient las ultimas emnas en la regiun d’asil Turitg. Avant che duvrar questa procedura faschevan mintga fin d’emna radund 40 persunas or da stadis da l’Afria dal Nord ina dumonda d’asil.
Sco il Secretariat da stadi per la migraziun ha ditg envers SRF, saja la situaziun sa midada dal tut dapi l’atun passà. La fin d’emna mez mars sajan s’annunziadas quatter persunas, la davosa fin d’emna sulettamain anc ina. La nova procedura duai impedir che persunas senza schanza vegnian insumma a far ina dumonda en Svizra.
In’autra interpretaziun
L'organisaziun Agid svizzer als fugitivs vesa quai auter. Tenor lezza sa tracti plitost da variaziuns stagiunalas. Perquai duain ins spetgar cun ina bilantscha almain enfin la stad.
L’idea è d’introducir las proceduras da 24 uras per persunas che han strusch ina schanza sin asil – sin tut ils center federal per requirents d’asil cun ina funcziun da procedura.
