Al cumenzament da la sessiun d'enviern elegia il Cussegl naziunal mintgamai il president u la presidenta da la Chombra gronda. Questa giada è quai Martin Candinas, il cusseglier naziunal da l'Allianza dal Center daventa uschia pli aut Svizzer. Elegì è el cun in resultat da 181 da total 188 vuschs. Candinas vegn uschia a seser il 2022/2023 sin la sutga presidiala e manar las tractativas dal cussegl ed era represchentar quel anoravers. Cun questa elecziun cuntanscha il Sursilvan ch'è dapi 11 onns en il parlament in punct culminant da sia carriera politica.
Ensemen
En ses emprim pled sco president novelegì ha el pledentà il parlament en tuttas quatter linguas naziunalas. El ha discurrì da l'impurtanza da la democrazia en temps uschè malsegirs sco oz, cun la guerra en Ucraina ed er malsegirezzas economicas en consequenza. El ha er accentuà l'impurtanza da la debatta sco tala e ch'i valia d'emprender d'acceptar las opiniuns d'auters per pudair collavurar ensemen empè dad ir vias parallelas in dasper l'auter u perfin in encunter l'auter.
Candinas ha er menziunà ch'el vegnia a laschar reparter damaun in pitschen vocabulari per che las sessiuns possian en avegnir er vegnir manadas, almain per part, per rumantsch.
Famiglia e collegas da la politica s'allegran
Divers collegas da la politica a Berna e dal Grischun s'allegran da quest onn cun Martin Candinas sco president dal Cussegl naziunal. Er la famiglia ha plaschair da sia elecziun. Da l'apero suenter l'avertura da la sessiun han tuts fatg in viva sin Martin Candinas.
Mesemna ha lieu a Mustér l'act festiv per l'elecziun da Martin Candinas sco president dal Cussegl naziunal. A las 14:00 avess Candinas dad arrivar a Mustér sin staziun. Lura datti in cortegi fin en claustra, nua che las festivitads han lura lieu.
Il sisavel Grischun che daventa pli aut Svizzer
Avant Martin Candinas èn anc tschintg auters politichers grischuns stads a la testa dal Parlament federal:
- Andreas Rudolf von Planta: 1865/66
- Andrea Bezzola: 1885/86
- Alfred von Planta: 1913/14
- Giusep Condrau: 1956/57
- Martin Bundi: 1985/86
Per festivar Martin Candinas en ses nov uffizi datti diversas festas. Uschia datti mesemna a Mustér in act festiv cun til e participaziun da prominenza sco era da la populaziun. La sonda lura suonda la festa a Rabius, ch'è la patria da Martin Candinas.
RTR dat in sguard enavos sin las entschattas politicas da Martin Candinas e sin sia carriera:
