Sisum la Surselva sur Medel duai vegnir installà in implant da test per gudagnar energia da vent e dal sulegl. I sa tracta dad in dals emprims implants ibrids en il territori alpin en Svizra. Sco quai che la Confederaziun communitgescha duai l'implant furnir datas a partir da l'auter atun fin la fin dal 2024. Il Departament da defensiun, ch'è responsabel per il project, investeschia radund in mez milliun francs en la fasa da test.
La dumonda per la lubientscha da bajegiar saja vegnida inoltrada a la vischnanca da Medel, entras Armasuisse immobiglias. Per las lavurs da preparaziun èsi planisà d'installar in prototip quest atun. Quel vegn mess sper la staziun da mez da l'anteriura pendiculara da transport militara. La Confederaziun quinta cun ina prestaziun da radund 27 uras megawatt per onn per la turbina da vent – e cun circa 35 uras megawatt per onn energia solara.
Ils resultat da l'implant da test duai lura decider schebain i vegn realisà il project cun nov implants ibrids a Medel. Il plaz da test sisum la Surselva hajan ins tschernì per l'ina pervi da l'infrastructura ch'è gia avant maun, per l'autra perquai che las cundiziuns da vent e la radiaziun dal sulegl sajan bunas. Ins n'haja betg evaluà auters lieus, pervi dals buns resultats da Medel.