Il comité d'iniziativa aveva gia annunzià ch'el veglia probabel retrair l'iniziativa. La cuntraproposta na tanschia betg per cuntanscher las finamiras da la cunvegna da Paris - i saja però pli impurtant d'agir svelt. La cumissiun da l'ambient dal Cussegl dals chantuns vuleva anc sminuir il sustegn per remplazzar stgaudaments, ed en quai cas n'avess il comité betg vulì retrair lur iniziativa.
Lescha enstagl midada da la Constituziun
Ina midada da lescha dovra, auter ch'ina midada da la Constituziun, nagina votaziun dal suveran. L'iniziativa vul cuntanscher netto nulla cun scumonds en la Constituziun. La cuntraproposta dal Cussegl naziunal percunter è ina lescha, cun la medema finamira.
Reducir las atgnas emissiuns u cumpensar ellas cun spargnar emissiuns en l'exteriur. Tuts dus duai esser pussaivel en la cuntraproposta a l'iniziativa da glatschers dal Cussegl naziunal. La lescha duai cumandar ina finamira da netto nulla emissiuns da gas cun effect da serra fin 2050.
La cuntraproposta cuntegna finamiras dad etappa che valan fin il 2040. L'industria duai per exempel reducir emissiuns sin la mesadad da quellas dal 1990. Stgaudaments d'ieli e gas pon ins remplazzar, tenor la cuntraproposta, cun sustegn dal stadi. 3,2 milliardas francs vul el metter a disposiziun.
