Davent il 2026 duai la fedpol – l'Uffizi federal da polizia – pudair nizzegiar tschertas datas da passagiers da sgol per cumbatter terrorissem e criminalitad greva. Tenor il cusseglier federal Beat Jans reglescha la nova lescha tge datas che societads da sgol svizras e da l'exteriur pon vegnir surdadas a las autoritads.
Grazia la nova lescha po la Svizra endrizzar in sistem naziunal «PNR» – Passenger Name Records – e simplifitgar la lavur da las autoritads da persecuziun penala. En cas ch'i exista in cumond d'arrestaziun tar ina persuna, vegn quai er signalisà sin la glista da passagiers. Uschia possian las autoritads responsablas vegnir admonidas pli spert – avant ch'il passagier è partì.
Senza l'introducziun dal sistem «PNR» pudess la Svizra tenor la communicaziun daventar ina pussaivladad da scappar en l'Europa. Persunas criminalas pudessan sgular en Svizra e continuar lur viadi en pajas da l'Europa per via terrestra – uschia mitschassan ellas pli simpel ils «PNR» sistems existens dal territori da Schengen.
