A Kägiswil en il chantun Sursilvania, sin la plazza aviatica, sgola el regularmain cun in aviun electric. Il «Velis Electro» da la fatschenta slovena «Pipistrel». Igl è l'emprim e fin ussa anc sulet aviun electric certifitgà.
Nus avain dastgà accumpagnar Curdin Bapst tar in gir sur il Lai dals Quatter Chantuns ed essan era vegnids datiers da la Rigi.
Quai sentiment d'esser sc'in utschè. Quai è sensaziunal. Da vesair il mund da surengiu.
-
Bild 1 von 5Legenda: Per pudair sgular na dovra l’aviun betg benzin, ma persuenter electricitad. RTR, Carmen Monn -
Bild 2 von 5Legenda: La plazza d'aviatica da Kägiswil è fin avant intgins onns anc vegnida duvrada dal militar. RTR, Carmen Monn
-
Bild 3 von 5Legenda: Ils differents aviuns ch'èn sin la plazza d'aviatica da Kägiswil han tuts lur plazs en las garaschas. RTR, Carmen Monn
-
Bild 4 von 5Legenda: La survista ord l'aviun. RTR, Carmen Monn
-
Bild 5 von 5Legenda: Era la Rigi han ins pudì vesair. RTR, Carmen Monn
Gia da pitschen è Curdin Bapst stà fascinà da l'aviatica. Cura ch'el aveva otg onns ha el vis per l’emprima giada ina MD-11. In aviun cun trais motors bajegià en ils Stadis Unids. Quai model saja stà sia emprima amur da l'aviatica e fascineschia anc adina el, di Curdin Bapst che lavura il mument sco inschigner d'aviuns tar Pilatus a Stans.
Nus avain discurrì cun el davart ses sgols preferids, dentant era davart la malsegirtad da la branscha aviatica. E per quellas e quels che vulan daventar pilota u pilot ha Curdin Bapst in tip: Esser flexibels ed adina avair in plan B.