En ils territoris da skis svizzers na vala nagin obligatori da certificat per la stagiun d'enviern che vegn. Tenor las Pendicularas svizras sajan ellas sa cunvegnidas cun la Confederaziun ed ils chantuns da na betg introducir mesiras da segirtad supplementaras il mument. Quai munta ch'i na vala betg in obligatori da certificat, mabain las medemas cundiziuns sco en il traffic public. Pia mascrinas en cabinas serradas e dadens. Ins veglia mantegnair questas mesiras pragmaticas er per il proxim enviern, uschia l'associaziun.
«Giustifitgà da tractar las pendicularas sco il traffic public»
Pendicularas senza certificat saja la soluziun actuala ch'ins haja discutà cun ils auters chantuns da muntogna e la Confederaziun. Sche la situaziun sa pegiurassia dentant, stuess'ins er discutar autras variantas, di Marcus Caduff, il minister d'economia dal Grischun. El è dentant da l'avis ch'i saja giustifitgà da tractar las pendicularas tuttina sco il traffic public. La soluziun cun mascrinas dadens ed en pendicularas serradas saja sa cumprovada l'enviern passà sco er la stad, uschia Caduff.
Experts dal BAG relativeschan
Da gia uss communitgar ch'i na dettia betg in obligatori da certificat tar las pendicularas saja gagliard, uschia ha ditg Patrick Mathys dal BAG sin dumonda da RTR. Ins stoppia vinavant observar la situaziun e decider tut tenor svilup. Plinavant saja chaussa dal Cussegl federal da prender ina tala decisiun e betg chaussa da las pendicularas. Las Pendicularas svizras avevan communitgà mardi ch'i sajan sa cunvegnids cun la Confederaziun ed ils chantuns da desister d'in obligatori da certificat.
Entant ha il cussegl federal prendì posiziun: Nagin certificat obligatori sin las pistas, però senza garanzia.
