Reto Gurtner resta president dal cussegl d’administraziun da la Gruppa Arena Alva. El ed ils auters commembers èn vegnì confermads en l'uffizi a la radunanza generala da la Arena Alva SA. Malgrad corona serra l’onn da gestiun 20/21 cun ina svieuta netto da 89,5 milliuns francs.
Preparar intgins szenaris
Il schef da la Gruppa Arena Alva Markus Wolf spera ch’i dettia in enviern normal. Forsa laschian tantas persunas virolar ch’ins pudess far valair che la pandemia saja finida – sco quai ch’il Danemarc fa. En scadin cas stoppian els sa preparar sin intgins scenaris, per exempel sche las pendicularas stuessan introducir in certificat da covid.
In certificat da covid fiss ina gronda sfida. Sch’ins ha en guants e skis enta maun, alura è tut in zic pli cumplitgà.
Reto Gurtner ha era discurrì en ses referats introductiv da covid.
Sche nus na cuntanschain betg l’immunitad collectiva, limitain nus nossa libertad anc pli fitg.
E plinavant ha il president dal cussegl d’administraziun discurrì da la midada dal clima. El ha appellà d’avair quità da nossa existenza. En connex cun la midada dal clima ha el ditg pli tard che la staziun da muntogna a Crap s. Gion duai daventar ina chasa da spargnar energia. Era projects sco Flem-Foppa-Naraus vegnan persequitads enavant. La finanziaziun da quel saja segirada, di Gurtner. Planisà èn pendicularas e sutgeras en il territori da skis ed indrizs da far naiv sur 2'000 meters. Ed era il project a Falera cun resort e pendiculara resta in tema.
