Suenter ina debatta da radund 7 uras suonda il Cussegl naziunal al Cussegl dals chantuns. Il parlament federal ha decis che babs duain survegnir in congedi da duas emnas suenter la naschientscha dal pop. Ils babs duain retrair las duas emnas entaifer sis mais suenter la naschientscha dal pop.
Uss sto la decisiun mo anc passar las votaziuns finalas. Cunter la decisiun pudess era vegnir prendì il referendum, dentant in tal na pari betg da dar.
Cun las dus emnas sustegna il parlament federal la cuntraproposta a l'iniziativa «Per in congedi da paternitad raschunaivel». L'iniziativa vul dentant in congedi da quatter emnas.
Iniziants vulan dapli
Duas emnas sajan in bun cumpromiss argumentescha ina gronda part dal parlament la decisiun. Ils custs stimads sajan cun 224 milliuns l’onn acceptabels. Cun quatter emnas vegnan quels stimads sin radund 420 milliuns.
Dentant ils iniziants na sajan betg cuntents cun in congedi da mo dus emnas. Sche els restan tar lur posiziun, decida il suveran svizzer a l’urna sch’el vul restar tar dus emnas ni auzar il congedi sin quatter emnas.
RR actualitad 17:00
