Las tractativas da paja da quest onn cuntentan en tut Travailsuisse, la Federaziun tetgala dals sindicats. Las pajas realas pudessan crescher levet il 2024, i dettia dentant era excepziuns. Questa bilantscha ha fatg Travailsuisse a Berna.
Cun pajas realas creschentas pon ins cunzunt quintar en branschas cun contracts collectivs da lavur. Vis sur l'economia generala quinta Travailsuisse cun ina stagnaziun da las pajas. Tut en tut sa chattan ellas dentant sut il nivel ch'è vegnì cuntanschì avant la pandemia.
La situaziun finanziala da las chasadas saja sa pegiurada ils onns 2021 fin 2023 sco anc mai ils davos 50 onns, ha Travailsuisse constatà a la conferenza da medias. En il passà n’haja quai dentant mai dà uschè in'opposiziun cumparegliabla dals patruns d’adattar las pajas a las novas realitads da pretschs sco ils ultims trais onns.
Augments tar professiuns cun pajas bassas
Positiv ha l'organisaziun giuditgà ils augments per part clers en branschas cun pajas bassas, per exempel tar las coiffeusas ed ils coiffeurs. Trumpada è Travailsuisse sa mussada dal naufragi da las contractivas en il sectur da construcziun e tar il persunal federal. Qua quinta l'associaziun cun perditas da paja realas.
Capacitad da cumpra sut squitsch
La capacitad da cumpra restia sut squitsch pervi d'augments da custs da locaziun, premias da cassas da malsauns, electricitad e taglias, ha crititgà l'uniun tetgala dals sindicats. Gia a partir dal prim da schaner 2024 pudessi dar novs augments dals custs.
