Il Cussegl federal quinta ils proxims onns cun deficits structurals da var 3 milliardas francs per onn. Quels sajan d'attribuir ad in grond augment da las expensas, surtut a favur da l'AVS e da l'armada. Ina cumissiun externa d'experts ha elavurà per incumbensa dal Cussegl federal in grond pachet da spargn. Da princip duain tut ils secturs da la Confederaziun strenscher la tschinta.
Il Cussegl federal ha suenter la preschentaziun dal pachet ils 4 da settember discutà cun partidas, chantuns e partenaris socials. Uss ha la regenza declerà, tge mesiras ch'el vul realisar.
Fin il 2027 vul il Cussegl federal distgargiar il budget da la Confederaziun per 3,6 milliardas francs. Da vent dal 2030 duai quai lura esser 4,6 milliardas. Cuntanscher quai vul il Cussegl federal cun ina glista da 60 mesiras. Cunzunt vul el realisar mesiras da spargn, be paucas mesiras duain augmentar las entradas.
Cunzunt mesiras da spargn
Il pli grond pais a lunga vista è la renunzia planisada a las contribuziuns federalas per la tgira d' uffants cumplementara a la famiglia. Quai duai distgargiar il budget federal a partir da l'onn 2030 per bunamain 900 milliuns francs l'onn. Ina mesa milliarda francs l'onn vul il Cussegl federal spargnar cun reducir la pauschala d'integraziun per fugitivs sin quatter onns.
Ulteriurs posts da spargn potenzials pli gronds:
- la renunzia da subvenziuns per la protecziun dal clima, per exempel per il program d'edifizis (400 milliuns francs)
- bloccar las expensas per l'agid al svilup (313 milliuns francs)
- las mesiras entaifer l'administraziun federala (305 milliuns francs)
- la reducziun dals deposits en il fond per l'infrastructura da viafier (200 milliuns francs)
- la contribuziun al fond naziunal (145 milliuns francs)
Da la vart da las entradas planisescha il Cussegl federal mo duas mesiras supplementaras en la dimensiun da circa 300 milliuns francs per l'onn 2028: Uschia duain retratgas da chapital or da la segunda e da la terza pitga vegnir suttamessas a la taglia pli auta en il futur. Ultra da quai examinescha il Cussegl federal d'ingiantar da nov tut ils contingents per l'import da bains agriculs, quai che pudess medemamain chaschunar entradas supplementaras.
L'armada na sto betg spargnar
Betg sin la glista da las propostas da spargn è l'armada. Sche las expensas da l'armada vegnissan augmentadas main svelt e sche la reconstrucziun da las abilitads da defensiun vegniss franada, stuess vegnir spargnà damain en auters secturs politics, ha la gruppa d'experts communitgà l'entschatta settember. Da quai na vul il Cussegl federal para savair nagut.
El na vul era betg stritgar la contribuziun da promoziun per il traffic da rauba u desister da promover la construcziun d'abitaziuns sco era da las prestaziuns transitoricas per persunas dischoccupadas pli veglias. Per part renviescha il Cussegl federal a projects pendents en il parlament, per part a decisiuns dal pievel ch'èn da resguardar.
Il Cussegl federal scriva da «valurs fundamentalas dal pachet da distgargia per las finanzas da la Confederaziun». Ils detagls duain vegnir preschentads en il rom dal project da consultaziun previsiblamain fin la fin da schaner 2025. Il Cussegl federal prevesa da preschentar in decret da mantel che cumpiglia midadas da numerusas leschas.
