Enfin l'onn 2040 dovra la Svizra 54'000 novs letgs per la tgira a lunga durada en chasas da tgira. Quai correspunda ad in augment da 69% cumperaglià cun la situaziun d'ozendi. U ditg auter: I dovra passa 900 novas chasas da tgira.
Stretgas en l'infrastructura
La raschun è che la populaziun vegn adina pli veglia: L'Observatori svizzer per la sanadad quinta ch'i dettia en radund 20 onns dubel uschè bleras persunas sur 65 onns e dubel uschè bleras persunas sur 80 onns.
Questa prognosa saja ina gronda sfida per il sectur da la sanadad. Sper dapli letgs per la tgira a lunga vista, quinta il studi era ch'i dovra 1'242 dapli letgs per la tgira a curta durada, quai che correspunda ad in augment da 60%. Era la Spitex duai quintar cun in augment da clients per passa 50%.
Mancanza da persunal
Betg mo l'infrastructura saja pertutgada, mabain era ina mancanza da persunal spetgia la Svizra. Il rapport actual da persunal da tgira parta dal fatg che fin l'onn 2035 vegnia a duvrar 35'000 persunas dapli en las chasas da tgira e 19'000 persunas dapli en la Spitex.
