- En Svizra è la cumpetenza da medias bassa.
- Per blers èsi grev da differenziar tar in artitgel tranter infurmaziun, commentari, reclama u fake news.
- Quai mussa in nov studi per incumbensa dal Bakom.
La cumpetenza da medias da la populaziun svizra n'è betg fitg auta. Quai mussa il studi «La cumpetenza da medias da la populaziun svizra» che la rait scientifica Politools ha fatg online per incumbensa da l'Uffizi federal da communicaziun Bakom. En media vegn la populaziun svizra tar la cumpetenza da medias sin 6 da 19 puncts pussaivels – pia gnanc in terz dals puncts pussaivels. Per bleras da las persunas dumandadas saja difficil da differenziar tar in artitgel tranter infurmaziun, commentari, reclama u fake news.
Persunas da lingua tudestga ed academichers han dapli cumpetenza
L’analisa tenor caracteristicas sociodemograficas classicas mussia che persunas da la Svizra tudestga, umens e persunas cun ina furmaziun pli auta possedian ina cumpetenza da medias pli auta che persunas da la Svizra franzosa, dunnas e persunas cun ina furmaziun pli bassa. Er hajan gruppas da vegliadetgna pli giuvnas ina cumpetenza da medias pli auta che gruppas da vegliadetgna pli veglias.
Areguard social media vesi or in zic meglier
Sco «detg legraivel» valiteschan ils auturs dal studi ils resultats en il sectur da las medias socialas ed er en connex cun posts da novitads dubius. En media hajan las persunas dumandadas respundì correctamain 60% da las dumondas en connex cun social media.
Tocs explicativs
Intermediaziun da cumpetenzas medialas – la purschida da RTR
Be paucs na sa fidan insumma betg
En pli mussia la retschertga che mo 10% da las persunas dumandadas n’haja nagina fidanza en la rapportaziun da temas politics e socials. Dentant sajan 20% da l’avis che medias e politica collavurian per manipular la populaziun. En pli saja la mesadad dals dumandads da l’avis, ch’ina democrazia possia er funcziunar senza il schurnalissem independent.
Studi represchentativ
Fatg part da la retschertga represchentativa han radund 3'000 persunas en Svizra tudestga ed en Svizra franzosa. Tenor il Bakom sa tracti da l’emprima retschertga da la cumpetenza da medias da la populaziun creschida en Svizra.