Nagina maioritad dals chantuns - Na a l'iniziativa per distgargiar da las premias

Suenter che tut ils chantuns han dumbrà las vuschs, è l'iniziativa per distgargiar da las premias vegnida refusada. Tenor Gfs Berna han 55,5% da la populaziun ditg Na. Plinavant n'ha l'iniziativa era betg pudì cuntanscher la maioritad dals chantuns.

PS è trumpada

L'inizianta da l'iniziativa, la partida socialdemocratica, è trumpada dal resultat. Las premias da las cassas da malsauns ch'explodeschian restan vinavant ina sfida per la populaziun, scriva la partida.

Tenor il cusseglier naziunal Jon Pult da la PS haja quest Na a l'urna probabel da far cun la differenza da las premias tranter ils chantuns. Uschia sajan las premias pli autas en ils chantuns da la svizra franzosa u er Basilea ch'en la Svizra tudestga, nua che la gronda part ha ditg Na a l'iniziativa.

Dentant er suenter quest Na vesa Jon Pult anc autras pussaivladads da far pli effizient il sistem da la sanadad publica. Tenor el duvrassi ina refurma per stgaffir ina cassa da malsauns publica ch'è administrada, sco per exempel la Suva u l'AVS enstagl questa «pseudoconcurrenza» tranter las 44 cassas da malsauns privatas nua ch'i dat adina puspè midadas. La PS lantscha il 2025 ina iniziativa per ina cassa da malsauns publica.

Franà custs da milliardas

• L'iniziativa per distgargiar las premias avess chaschunà custs supplementars d'annualmain fin 11,7 milliardas francs, ha communitgà la partida populara svizra . Per cuntanscher quai avess la taglia sin la plivalur stuì vegnir auzada per ulteriurs dus fin trais puncts procentuals. Quai avess muntà a 1'200 francs per chasada. La populaziun haja chapì questa redistribuziun zuppada sin donn e cust da la classa mesauna. La cuntraproposta indirecta, che entra ussa en vigur, oblighescha plirs chantuns d'augmentar las reducziuns da las premias.
• Er la partida liberaldemocratica discurra d'in success per la classa mesauna. L'iniziativa haja bain prendì si in quità da la populaziun, dentant furnì il recept fallà. L'iniziativa avess mo cumbattì ils sintoms, ma avessi gì per consequenza custs da milliardas. Uss pudess la cuntraproposta ir en vigur che saja finanzialmain la meglra schliaziun.
• Ed er l' Allianza dal center è cuntenta che uss po ir en vigur la cuntraproposta che saja pli responsabla, sco la partida ha scrit.
• La cussegliera naziunala bernaisa da la partida verd-liberala Melanie Mettler ha declerà: «Nus stuain ussa garantir che nus prendain las mesiras ch'èn gia daditg enconuschentas e che pon vegnir realisadas concretamain, per reducir duplicitads e fauss impuls en il provediment da la sanadad e per franar uschia l'augment da las premias.»

Grischun refusa l'iniziativa per distgargiar las premias

Suenter che tut las 101 vischnancas grischunas han dumbrà las vuschs, din bunamain 65% Na e passa 34% Gea a l'iniziativa che vul distgargiar las premias. La participaziun da votaziun è tar bun 41%.

En il Grischun han bunamain tut las vischnancas votà cun Na. Sulet intginas vischnancas en las valladas talianas e la vischnanca da Schmitten èn stadas per l'iniziativa.

Grischun: Iniziativa per distgargiar da las premias