Mintgin e mintgina duai pudair controllar tar la vischnanca per tge ch'el u ella ha dà sia suttascripziun – quai pretenda il cusseglier naziunal Martin Candinas da la partida il Center Uschia possia mintgin e mintgina esser segir che sia suttascripziun na vegnia betg malduvrada e ch'i na dettia naginas falsificaziuns, declera el.
«In motiv è stà il scandal da suttascripziuns l'entschatta da l'onn», di Martin Candinas. «En quest mument hai dà bleras ideas co ch'ins pudess evitar quai en avegnir». Sia idea è stada ina midada da la lescha ch'el ha inoltrà sco moziun la fin da settember. Ussa, dus mais e mez pli tard, ha il Cussegl federal respundì.
El scriva ch'i na saja betg necessari da midar la lescha – i dess gia ina lescha correspundenta. En Svizra ha mintga persuna il dretg da dumandar sia vischnanca per sias suttascripziuns. Per Martin Candinas è quai ina gronda surpraisa.
Sche quai è effectivamain uschia che la lescha tanscha sco ch'ella è ussa, alura resta mo la dumonda: co vegn quella realisada?
«Suenter mias dumondas, che jau hai fatg ordavant, ins m'ha adina ditg che quai na saja atgnamain betg pussaivel», di el – el haja perquai era inoltrà la moziun. Sche quai constat dentant, sco ch’il Cussegl federal di, lura è la dumonda uss in’autra – numnadamain co che la lescha vegn realisada.
Pertge er sch'i dettia questa lescha, la realitad vesia ora auter. La gronda part da las vischnancas e dals chantuns na sappia gnanc, ch'i dettia questa lescha, di Martin Candinas. «Ussa vai per midar questa realitad».
Il problem n'è betg che la lescha è insuffizienta, mabain, sco ch'i para, co realisar questa lescha.
Per Martin Candinas n'è il tema betg terminà cun la resposta dal Cussegl federal. Ussa vai per garantir la realisaziun da la lescha e che las vischnancas ed ils chantuns interpreteschan questa lescha tuttina sco il Cussegl federal. Ed alura er, che quella vegnia realisada endretg.