Il scandal da cugliunarias en connex cun la rimnada da suttascripziuns per referendums ed iniziativas dal pievel ha squassà la politica federala. Da differenta vart è il sistem da ramassar suttascripziuns vegnì crititgà ed igl è vegnì pretendì dapli transparenza.
Il cusseglier naziunal grischun Martin Candinas da l’Allianza dal Center ha ussa inoltrà ina moziun che vul gist augmentar questa transparenza per las votantas ed ils votants. El pretenda dal Cussegl federal da midar la basa legala uschia, che las votantas ed ils votants pon prender invista da tut temp tar lur vischnanca per tge iniziativas e referendums ch’els han inoltrà lur suttascripziun.
Grond sustegn or dal Cussegl naziunal
Che la proposta dal politicher grischun chatta sustegn mussan las 50 suttascripziuns da politicras e politichers da la Chombra gronda da tut las fracziuns che sustegnan la moziun. Uschia han era Jon Pult da la PS ed Anna Giacometti da la PLD suttascrit la moziun. Annunzià la moziun aveva Martin Candinas a chaschun da la davosa episoda dal podcast «Café federal» da RTR. En l’episoda discutescha Candinas ensemen cun Jon Pult e la correspundenta Fabia Caduff ed il correspundent Adrian Camartin davart il scandal da suttascripziuns e las consequenzas da quel.
Quai è capità
Entschatta settember èsi vegnì enconuschent che la Procura publica federala investigheschia pervi dal suspect dad elecziuns falsifitgadas. Ella ha instradà diversas proceduras cunter persunas natiralas e cunter nunenconuschents.
Mez settember ha lura il Cussegl federal communitgà che la Confederaziun na sistescha naginas iniziativas pendentas e na controllescha naginas suttascripziuns danovamain.
