Las federaziuns dals medis e da las medias svizras FMH, sco era da las apotecras e dals apotechers, Pharmasuisse – desistan ussa tuttina dad in agen certificat da Covid. Quai han communitgà las duas federaziuns.
Cun quai che la Confederaziun insistia sin ina soluziun centrala – na possian els betg realisar ina atgna soluziun. Quai scrivan ils medis ed ils apotechers, suenter ch’els han anc discurrì ina giada cun la Confederaziun il venderdi.
I tunava auter avant trais emnas
Anc l’entschatta da matg avevan las duas federaziuns professiunalas annunzià – ch’ellas porschian malgrà la soluziun centrala da la Confederaziun in agen certificat da Covid. Lur via saja pli svelta e main birocratica, avevan las federaziuns punctuà.
Il Cussegl federal ha annunzià avant curt, da vulair porscher il certificat da Covid svizzer davent dals 7 da zercladur.
