Mez matg vul la Confederaziun decider, tgi che duai sviluppar per la Svizra in certificat da corona. Quel dessi per glieud vaccinada, per tgi che ha gì Covid-19 e per tgi ch'ha in test negativ actual. Sper ils dus furniturs pussaivels, vulan uss er la Federaziun dals medis FMH e la Federaziun dals apotechers Pharmasuisse porscher in certificat segir. Quai rapporta la «NZZ da la dumengia».
Avant avevan las duas federaziuns proponì senza success lur schliaziun a la Confederaziun. Uss pretenda la FMH e Pharmasuisse, ch'els possian porscher pli spert che la Confederaziun in certificat segir.
BAG beneventa las stentas
L'Uffizi federal da sanadad BAG beneventa las stentas da chattar ina schliaziun per in certificat da vaccinar da corona. La Confederaziun stettia vinavant en stretg contact cun ils partenaris svizzers da la sanadad. Quai ha scrit il BAG sin dumonda da SRF.
Il Cussegl federal decida mez matg, tgi che sviluppescha tecnicamain il certificat online.
