En connex cun la cumpra da vaccins cunter Covid-19 datti ina inquisiziun administrativa. Quella ha instradà Alain Berset, il minister da sanadad. I stoppia vegnir sclerì, schebain tut las cumpras sajan stadas garantidas cun credits. Cunzunt n'èsi betg cler, schebain las resalvas dal parlament sajan vegnidas integradas en ils contracts.
La controlla da finanzas dal Cussegl naziunal è «tut auter che cuntenta» cun la situaziun. Tenor ella pudessan eventualas negligientschas restrenscher la suveranitad dal parlament en connex cun il preventiv.
Exempel ha mussà che las resalvas n'eran betg part dal contract
Remartgà ils problems han ins mesemna cura ch'il Cussegl dals chantuns ha vulì scursanir in credit posteriur per cumprar vaccins. En quest connex èsi sa mussà ch'il credit posteriur na po betg vegnir scursanì tenor giavisch, perquai che las resalvas n'èn «para betg vegnidas integradas en ils contracts cun ils furniturs da vaccinaziun».
In expert extern duai uss sclerir sche l'Uffizi federal da sanadad BAG ha suttascrit contracts senza respectar ch'il parlament decida davart quantitad e pretsch.
