Ina finamira da la Lia svizra per persunas malsaunas da raischens è da far pli enconuschent malsognas da raischens. Ina da quellas malsognas è la uschenumnada «Frühsommer-Mengioenzephalitis», curt FSME. Igl è ina malsogna che po chaschunar infecziuns dal tscharvè e da la paletscha dal tscharvè.
Il vicepresident da la Lia Werner Tischhauser giavischa dapli sustegn da far pli enconuschent questa malsogna, sco ch'el ha ditg envers il schurnal regiunal da SRF. Concretamain vul el, ch'ins fetschia attent quellas persunas che vulan viagiar en Svizra – surtut persunas da l'America dal Nord. Là na datti numnadamain betg la malsogna FSME.
Quai è in proceder normal sch'ins va insanua en vacanzas. Sche nus giain en in territori tropic, ponderain nus er la prevenziun cunter malaria.
El di, che las organisaziuns turisticas sajan responsablas per quai. Er sch'i saja in tema plitost malempernaivel, fetschia senn da far attent la glieud sin ina vaccinaziun da FSME.
Ma Svizra Turissem na vul savair nagut da quai, sco ch'els han ditg envers il schurnal regiunal dad SRF. Sia incumbensa saja da far reclama per la Svizra sco destinaziun turistica – prevenziun da malsognas na tutgia betg tar quai. Sumegliant tuna quai tar Grischun Turissem.
«Natiralmain fai senn ch'ins s'infurmescha davart la medischina da viadi, sch'ins va en viadi pli lunsch», di il pledader da medias da Grischun Turissem Luzi Bürkli envers il regiunal schurnal dad SRF. «Nus crain simplamain ch'i dettia paginas correspundentas per talas infurmaziuns».
Da la Confederaziun datti ina pagina d'internet che respunda diversas dumondas en connex cun la Svizra en englais – là stat er ch'els recumondan ina vaccinaziun cunter raischens. I vegn dentant probabel a restar tar quai.