Il suveran svizzer na sto il proxim temp betg anc ina giada votar davart la lescha da chatscha. Il referendum cunter la revisiun da la lescha n’è numnadamain betg reussì. Il termin per rimnar las suttascripziuns necessarias è scadì sonda passada. Als iniziants saja be gartegià da rimnar var dus terzs da las 50'000 suttascripziuns necessarias, uschia il manader da la campagna Roberto Babst vers RTR.
In motiv è segir che las organisaziuns d'ambient grondas n'han betg fatg cun, il segund motiv è che nus n'essan betg stads preschents en las medias ed il terz motiv è ch'i ha dà ils davos dus onns ina midada dal pensar tar la glieud. La glieud ha uss propi tema dal luf.
Nagin sustegn dal WWF e la Pro Natura
Il motiv principal che las suttascripziuns necessarias n'èn betg vegnidas ensemen è tenor ils iniziants che las grondas organisaziuns per la protecziun da l’ambient sco il WWF e la Pro Natura han decidi en schaner da betg sustegnair quest referendum. Sin basa da la nova lescha saja ina co-existenza da luf ed uman pussibla.
Referendum cunter nova regulaziun dal luf
Il december passà avevan organisaziuns pli pitschnas sco l’Uniun per la protecziun d’animals selvadis lantschà il referendum cunter la nova lescha da chatscha ch'il parlament aveva approvà curt avant. La organisaziuns crititgeschan ch’ils chantuns dastgan da nov regular la populaziun da lufs tranter l’entschatta da settember e la fin da schaner, er sche quels n’han anc fatg nagins donns.
