In comité d'iniziativa ha cumenzà a rimnar suttascripziuns per abolir la protecziun dal luf en Svizra. L'iniziativa pretenda ch'il luf po vegnir sajettà dapertut, auter ch'en il Parc Naziunal Svizzer e quai sur l'entir onn.
Ils ultims tschintg onns saja il dumber dals lufs creschì per il tschintgdubel, fa il comité d’iniziativa valair. La tratga d'animals sin pastgiras ed en stallas libras daventia uschia adina pli difficila.
Ils iniziants vulan in nov paragraf en l'artitgel 79 da la Constituziun federala. Quel reglescha las cumpetenzas da la Confederaziun per la chatscha e pestga. Ils iniziants han ussa temp fin il november 2024 da rimnar las 100’000 suttascripziuns necessarias.
Davos l'iniziativa stattan purs e puras da vatgas, nursas e chavals, dals chantuns da Zug, Glaruna, Sviz, Argovia e Lucerna. Dal chantun Grischun sco er dal Vallais sco chantuns ferm pertutgads da la tematica enturn il luf n'è nagin en il comité d'iniziativa.
