Passa 1'000 cas ha quai gia dà en Svizra cun l'infecziun da la lieunga blaua. Quai cunzunt en las regiuns da la Svizra tudestga e romanda. Pli ferm pertutgadas èn nursas, tar ellas sa sviluppa questa malsogna pli svelt ed era pli ferm che tar vatgas. Dapi l'avust han ils cas che ston vegnir annunziads als uffizis prendì tiers fermamain:
L'Uffizi federal da segirezza alimentara e fatgs veterinars noda ils 15-10-2024 en tut 573 cas d'infecziun tar vatgas e 596 tar nursas. Sis chauras èn era pertutgadas. En il chantun Grischun n'ha quai fin qua anc dà nagins cas, però en ils chantuns vischins dal Tessin, Glaruna e Son Gagl èn cas registrads.
Il vaccin – in levgiament
En l'Ollanda, en Germania u en Frantscha vegn duvrà fitg bler vaccin. Quel n'era fin qua betg lubì tar nus en Svizra. In levgiament da l'infecziun duess quai dar cun il vaccin ch'è vegnì dà liber da l'Uffizi federal da segirezza alimentara e fatgs veterinars. Da questa nova è er il veterinari chantunal levgià:
La pussaivladad da vaccinar il futur biestga e nursas cunter il tip BTV-3 è per puras e purs in grond levgiament. Els pon uschia proteger lur animals il meglier pussaivel da sintoms e cunzunt da la mort.
Actualmain cusseglia l'Uffizi chantunal per la segirtad da victualias e per la sanadad d'animals d'evitar commerzi e transports d'animals, nua che quai va. Cass da dubis duajan vegnir sclerids. Ed ins duessia metter enturn mesiras da profilaxa cunter ils mustgins, p. ex. cun raits u sprays cunter mustgins.
Cun l'agid dal vaccin speran ils responsabels da pudair cumbatter il virus uschè bain sco pussaivel. Vegniss quai tuttina tar in cas, lura avess quai era consequenzas negativas per il bain puril.
Uss va la fiera, nus avessan anc da vender vatgas. Sch'il manaschi vegniss serrà, lura mancassan quellas entradas.
La strategia dal veterinari chantunal è da surmuntar l'enviern – tras il temp senza mustgins – cun uschè pitschens donns sco pussaivel. Sch'ils mustgins vegnan puspè activs la primavaira, pudess quai esser che la malsogna sa derasa sco in'explosiun, uschia Giochen Bearth. E perquai elavuran els en quest temp ina strategia da la vaccinaziun, che vegn ad esser questa giada voluntaria. Ils custs ston ils purs e las puras surpigliar sezs.
Dejà-vu cun ils onns 2008, 2009 e 2010
L'emprim cas da la malsogna da la lieunga blaua è vegnì registrà en Svizra l'october 2007. Quai era cun il tip BTV-8. Silsuenter è questa malsogna sa derasada, stgars 80 cas èn vegnids annunziads. Per far frunt a la malsogna ha la Confederaziun decidì in obligatori dal vaccin, quai ha procurà per part per critica. Tuttina, l'onn 2011, suenter diversas campagnas da vaccinar, è la malsogna stada surmuntada e valeva sco extirpada en Svizra. Fin ussa il 2024, cura ch'ella è puspè turnada, quai dentant cunzunt cun il nov tip, il BTV-3. Cuntrari als onns 2008-2010 na vala questa giada nagin obligatori da vaccinar, igl è voluntari.
