La malsogna da la lieunga blaua sa derasa puspè en Svizra. L'emprima giada dapi 4 onns hai puspè dà cas da la malsogna tar animals en Svizra la fin d'avust. En tut èn pertutgads 19 chantuns, communitgescha l'Uffizi per segirezza da victualias e fatgs veterinars (USV). En il Grischun n'èn enconuschents anc nagins cas. Pertutgà il pli fitg è actualmain il Giura cun 150 bains che tegnan animals. Però era en ils chantuns Turgovia ed Argovia saja il dumber dals cas registrads preoccupant. Per il carstgaun na saja la malsogna che vegn transferida da mustgins betg privlusa, di il directur da l'USV Hans Wyss vers SRF. Era il consum da charn dad animals infectads na saja betg privlus. Per ils animals saja la malsogna però privlusa.
Puras e puras pretendan vaccin – Frantscha ha agì
Era l'Uniun purila svizra sa mussa preoccupada. Las cundiziuns da l'aura hajan ussa promovì la derasaziun da la malsogna, scriva l'Uniun purila en ses newsletter. Ed en spezial fan ils purs quitads per las nursas, nua che la mortalitad saja spezialmain auta – però era vatgas sajan periclitadas. Ins saja en discurs cun pliras varts per avair uschè spert sco pussaivel in vaccin per ils animals. Ils vaccins actuals na sajan ubain betg anc lubids, ubain betg disponibels. Entant marscha en Frantscha in program da vaccinar las nursas, nua ch'ils stadi ha concedì 75 milliuns euros per dumagnar la malsogna.
| Animal | Bains pertutgads |
| vatga | 290 |
| nursa | 369 |
| chaura | 3 |
| auter animal da chasa | 2 |
| Total | 664 |
Actualmain sa derasa surtut la varianta BTV-3 dal virus da la lieunga blaua en Svizra. Quai è in tip che n'era fin ussa betg preschent en la Svizra. Ed actualmain quinta l'Uffizi federal per segirezza da victualias e fatgs veterinars en tut 664 bains da tratga d'animals ch'èn pertutgads.
Ord l'archiv
La lieunga blaua ha adina puspè procurà per discussiuns e tensiuns en il Grischun. Saja quai cun adina puspè turnar e smanatscha ils animals – u saja quai cun l'opposiziun dal pur Tumasch Planta che na vuleva betg laschar vaccinar sias nursas malgrà obligatori, ed il medi chantunal Rolf Hanimann ch'ha silsuenter confiscà e vaccinà las nursas. In cas che era la finala ì avant tribunals...
