Il Cussegl federal ha concludì ils 29 da schaner 2025 da surlavurar cumplessivamain la lescha davart la medischina da reproducziun. En il center da la refurma planisada stat l'admissiun legala da la donaziun da cellas d'ov sco ch'il parlament aveva pretendì cun la moziun «Ademplir il giavisch dals uffants, legalisar la donaziun da cellas d'ov per conjugals». Il Cussegl federal ha fixà las valurs da basa per questa novaziun e propona ultra da quai da pussibilitar la donaziun da cellas d'ov e da sems er a pèrs nunmaridads.
Donaziun da cellas d'ov e da sems
Fin ussa era la donaziun da cellas d'ov betg pussaivla e l'access a la donaziun da sems limità a pèrs maridads, cun l'introducziun da la «Lètg per tuts» han dapi il fanadur 2022 era pèrs da dunnas maridads access a quella.
La revisiun da la lescha planisada duai ussa dar la basa legala era per donaziuns da cellas d'ov. En il center duai latiers star la protecziun da las donaturas da cellas d'ov ed il bainstar da l'uffant. Era duai la revisiun pussibilitar a pèrs nunmaridads l'access a donaziuns da sems e da cellas d'ov, perquai che la regulaziun actuala na vegnia betg pli resguardada sco actuala.
Examinar ulteriuras midadas
Ultra da quai duain vegnir examinadas ulteriuras midadas en la revisiun da la lescha. Latiers tutga la schluccada pussaivla da la «regla 12» per la fertilisaziun in vitro. Quella permetta actualmain da sviluppar maximalmain 12 embrios per ciclus da tractament. Era duai vegnir examinà sch'ins po conservar cellas da spermas, cellas d'ov ed embrios schelads pli ditg che fin uss (10 onns).
Il departament da l'intern è vegnì incumbensà d'elavurar fin la fin dal 2026 in text da consultaziun.