Las organisaziuns per la protecziun da l’ambient e per la protecziun da la natira han surdà oz a la Chanzlia federala las 65'000 suttascripziuns verifitgadas cunter la lescha da chatscha. Suttascrit hajan passa 100'000 persunas il referendum, scrivan las organisaziuns.
La revisiun da la lescha da chatscha prevesa tranter auter ch'ins dastga sajettar animals protegids, sco per exempel il luf, era avant ch'els fan donn. Quai per regular la populaziun.
Memia rigurus
Tenor las iniziantas dal referendum, tranter quellas las organisaziuns Pro Natura, WWF Svizra, BirdLife Svizra e la Gruppa Luf Svizra mettia la lescha nova en privel la biodiversitad da la Svizra. Il Cussegl federal survegnia uschia era la cumpetenza da lubir da sajettar era tals animals protegids il futur che n’èn oz betg pertutgads da la lescha nova. Ultra da quai èn las organisaziuns dal maini che quella lescha cuntrafetschia a cunvegnas internaziunalas per la protecziun d'animals.
RTR novitads 11:00