La nova lescha da chatscha sutmineschia la protecziun da spezias, crititgeschan las associaziuns Pro natura, WWF, BirdLife, Gruppa dal luf Svizra sco er zooschweiz en ina communicaziun. Er la Protecziun svizra dals animals veglia ramassar suttascripziuns. Tenor quellas organisaziuns sutmineschia la nova lescha la protecziun da spezias. Er lufs giuvens possian vegnir sajettads preventivamain. La lescha vertenta porschia in bun equiliber tranter protecziun e chatscha sin animals. Auters crititgeschan che la lescha giaja bler pli lunsch che quai ch’il Cussegl federal aveva proponì.
Las organisaziun d'ambient crititgeschan er ch'ils chantuns survegnian memia bleras cumpetenzas e che mintga chantun pudess lura far tge ch'el veglia.
Fitg probabel decida il suveran a l'urna
Ils adversaris han uss peda 100 dis per ramassar las suttascripziuns ch'èn necessarias per in referendum. Che quest referendum reussescha e che il pievel svizzer ha lura l'ultim pled a l'urna è tant sco segir, pertge ils Socialdemocrats ed ils Verds avevan gia annunzià en il parlament da sustegnair il referendum.
RR novitads 10:00