Bibliotecas èn en in boom: La GGG Biblioteca da la citad da Basilea ha gì l'onn passà var dus milliuns emprests. Durant il temp d'examen èn er las plazzas d'emprender en las scolas autas stgarsas. Ma nua legian ed emprendan ins il meglier? Ina survista per persunas che legian bler sco er per studentas e students.
La pli bella
La biblioteca dal chapitel da Son Gagl, fundada 612 da Gallus, vala sco ina da las pli veglias bibliotecas dal mund e posseda ina da las pli custaivlas collecziuns da manuscrits. La renumada sala baroca è in magnet per il public e vegn visitada mintg'onn da passa 170'000 persunas.
La pli populara
A l'universitad da Turitg sa chatta la biblioteca imposanta da la facultad da giurisprudenza, creada da l'architect Santiago Calatrava. Sin TikTok vegn ella savens celebrada sco favurita absoluta tranter studentas e students.
Las plazzas èn qua fitg tschertgadas e restan savens occupadas ditg. Igl è uschia cusseglià da cumparair avant che las portas s'avran. La sala è dentant isolada mal, uschia ch’igl è dad esser precaut cun entrar e sortir.
La classicra
La biblioteca universitara da Basilea è la pli veglia biblioteca mundana da la Svizra. Sper 7,5 milliuns cudeschs porschan l'edifizi principal, la sala da leger gasettas ed il chantun dal magazin plazzas da leger. Er il seminari tudestg metta a disposiziun plazzas da lavur spezialas. La biblioteca fascinescha tras ses scharm classic e ses interiur che fa endament ina stiva patgifica.
-
Bild 1 von 2. Edifizi pincipal da la biblioteca universitara da Basilea. Bildquelle: UB/Mark Niedermann.
-
Bild 2 von 2. Sala da leger gasettas. Bildquelle: UB/Mark Niedermann.
La coola moderna
L'anteriura fabrica da latg da l'areal Toni a Turitg dat alloschi ad ina scola auta spezialisada (ZHAW) sco er ad ina scola auta d'art (ZHdK). La biblioteca ch'appartegna latiers metta l'accent sin la psicologia applitgada, sin la lavur sociala sco er sin l'art e sin la designaziun. Sin trais etaschas datti 120 plazzas d'emprender. Intginas plazzas porschan ina bella vista sin Turitg.
Il bun tip
La Burgerbibliothek a Berna n'è betg mo equipada excellentamain, l'architectura interna da la sala da Haller as regorda a temps passads. Ultra da purtrets istorics, d'in balcun interiur e d'in candelaber pon ins leger qua sco en in chastè.
-
Bild 1 von 2. Sala Haller en la Burgerbibliothek a Berna. Bildquelle: Franziska Rothenbühler.
-
Bild 2 von 2. Plaun sura da la biblioteca. Bildquelle: Franziska Rothenbühler.
La pitschna, ma fina
Pitschna, ma er fina sa preschenta la biblioteca dal Museum naziunal svizzer en il nov edifizi. Cun in sguard sin la Limmat e sin il Platzspitzpark pon ins er giudair qua ina visita dal museum. Ultra da medias davart l'istorgia culturala, davart l'istorgia e davart l'istorgia d'art datti er exponats actuals davart las exposiziuns dal museum. La biblioteca porscha be paucas plazzas da lavur, ma durant la stad è il balcun avert.
Il stgazi literar
En la sala da lectura da la Societad da museum da Turitg, era numnada «Literaturhaus», èn gia sesids Gottfried Keller, Lenin, Kurt Tucholsky e James Joyce. Per la gronda sala da lectura protegida da monuments è necessaria ina commembranza, i custa pia d’entrar la biblioteca. Dal pitschen «salun» pon ins dentant far diever cun ina carta da students.
Il «bibliotel»
In'alternativa nunusitada porscha il Boutique-hotel B2, directamain sur il spa dal Hürlimann. En sia halla d'entrada sa chatta in lieu da scuntrada cun ina biblioteca impressiunanta che cumpiglia 33'000 cudeschs e che fa endament il film da Disney «Die Schöne und das Biest». Chandaliers marcants or da buttiglias decoreschan il sectur da l'ustaria.
Per restar si qua ston ins consumar bavrondas u spaisas. As infurmai er tenor las reglas dal laptop, perquai che tscherts cafés ed ustarias han introducì in scumond da laptop durant las fins d'emna.