Mardi damaun curt avant las 09:30. Igl è grisch e bletsch. E tuttina – u forsa grad perquai – è sa furmada avant la biblioteca da la citad da Cuira ina lunga colonna ord charrotschas e geniturs. Tar l'entrada da la biblioteca stat in grond um, cun chavels lungs ch'èn liads tar in dutt. El tegna enta maun ina ghitarra e lascha entrar pitschen e grond.
Ses num è Mauro Büchler. Ed el è il motiv pertge che grond e pitschen vegnan regularmain en biblioteca. El è responsabel per la purschida cun il num «Naschì per leger» ni per tudestg «Buchstart». Nua ch'el prelegia mintgamai ina istorgia per quels uffants ch'èn anc memia pitschens per leger sez.
Avant che sa platgar en il salv davosvart da la biblioteca ch'è drizzà en cun in grond tarpun e plimatschs cumadaivels, vegnan tratgas or las pelerinas ed ils chalzers. Suenter tschertga mintgina e mintgin in plazzin sin il tarpun strivlà, per il pli tschentà grad dasper ni sin mamma u bab.
Il cudeschet ch'è mess si il pli davant sin ina maisetta grischa para betg d'esser nov per tuts. In mattet raquinta a sia mamma en tutta autezza tge che capita a la fin dal cudesch. Lezza prova d'evitar il spoiler. Mauro Büchler sveglia las mirveglias dal mattet cun dir che l'istorgia saja oz in pau autra che sco ch’el la enconuscha. Oz fetschian els numnadamain ensemen ina band.
Insatge manca anc. Mila, la lindorna da plisch. I tutga tar il ritual ch'ils uffants chattan la chanzun da la lindorna entant che Mauro Büchler prenda l'animalet da plisch or d'ina cofra naira.
Ina band dovra instruments. Perquai spachetescha Mauro Büchler or da sia tascha da tgirom da tuttas sort chaussas interessantas. Rasslas, scalins, trianguls ed ina suna da bucca – u sco che el di ina «Schnorragiga». Lezza è spezialmain dumandada tar ils uffants. Gist plirs s'annunzian cura ch'el dumonda tgi che vuless pruvar or la suna bucca.
Lura va la prelecziun per propi libra. Accumpagnada da blera musica. Mintga giada ch'ils animals en il cudesch fan musica, mussa dirigent Mauro ina tavla da chartun verda. Alu san ils uffants exact tge far: Sunar l'instrument uschia dad aut sco pussaivel. E cura che la tavla cotschna cumpara vegni puspè quiet e l’istorgia cuntinuescha. Uschia vegn cuntinuà enfin che la mamma tschuetta cumpara en l'istorgia e rimna tut ils instruments. Quai è il mument ch'era la band d'uffants en biblioteca returnan lur instrument en la tascha da tgirom.
La prelecziun è a fin, il pitschen eveniment dentant anc betg. Mintgamai suenter la prelecziun han ils uffants temp per guardar sez cudeschets da chartun cun lur persunas accumpagnantas. Ils cudeschs èn pachetads en dus gronds satgs. In mellen ed in blau. Gia il spachetar e sa decider tge cudesch ch'ins duess prender sco emprim è in'aventura.
Bleras da las audituras ed auditurs èn giasts regulars en biblioteca. E la purschida «Naschì per leger» chatta bun'accoglientscha tar pitschen e grond. Ina mamma manegia che ses figl raquinta la saira mintgamai cun grond gust al bab tge cudeschet ch'è vegnì prelegì.
E gust ha er il pedagog da biblioteca, Mauro Büchler, ch'è sez bab da famiglia. Ed vesa oravant tut il senn da sia lavur.
L'autur da cudesch d'uffants, Lorenz Pauli ha ina giada ditg ch'ins na dovria betg 100 milliuns cudeschs, mabain ch'ins dovra oravant tut insatge che guarda cun ins ils cudeschs. E jau chat exact quai è il punct.
Suenter in mument annunzian tuns loms da ghitarra la fin da l'occurrenza. Ils uffants gidan da far urden cun ils cudeschs e lindorna Mila va enavos a letg en la cofra naira. Ma l’emprim survegn lezza in pèr charsinada dals pitschens.