Po en l'avegnir mintgin far mintga lavur? Ston ins be pli anc dar cumonds e l’intelligenza artifiziala surpiglia il rest? Na, di Elisabeth Ehrensperger, la manadra da TA-Swiss, l'organisaziun che perscrutescha las consequenzas da tecnologias.
Ins sto esser clever per dar buns cumonds.
Per dar buns cumonds a l’intelligenza artifiziala dovri diversas abilitads e cumpetenzas, di l’experta. Ins stoppia enconuscher bain la tematica per pudair far la dumonda decisiva. Ed oravant tut ston ins savair valitar la resposta, metter quella en in context e savair tge far cun quella.
Cumpetenzas sa spostan
Tge che quai vul dir per ils singuls secturs e per ils singuls mastergns sto pir anc vegnir evaluà. Dentant era sche l’intelligenza artifiziala scriva per exempel sin cumond chanzuns, ston ins savair co che quai funcziuna per pudair valitar sche quai è ina buna chanzun u betg. E sch’ins vul ina chanzun creativa, che sa differenziescha, lura na possian ins era betg surlaschar quai a la maschina, di Ehrensperger.
Elisabeth Ehrensperger è politologa. Ella ha studegià istorgia, scienzas politicas e medias a l' universitad da Berna. Ella maina la fundaziun TA-Swiss, che perscrutescha las consequenzas da tecnologias.
Però èsi probabel che las cumpetenzas sin il martgà da lavur sa midan. Uschia surpiglia l’intelligenza artifiziala la lavur da la tschertga d’ina resposta, ma pudair valitar quella è uschè impurtant sco anc mai. Metter quai ch’ins survegn en il context e savair tge far cun la resposta vegn adina pli impurtant. Perquai ch'era l’intelligenza artifiziala fetschia sbagls, di Elisabeth Ehrensperger.
Il siemi d’ina meglra work-live-balance
Tge che saja dentant in'illusiun, è da crair che l’intelligenza artifiziala porschia in meglier equiliber tranter temp liber e lavur. Era sche quella surpiglia diversas lavurs, saja quai plitost in siemi d’avair dapli temp. Quell’illusiun avev’ins era cun il telefonin e capità è il cuntrari cura che quel è daventà noss cumpogn.
Era cun introducir il telefonin avev’ins l’impressiun ch'ins spargnia temp.
Era pon ins observar gia uss en il sistem da sanadad: Per pudair lavurar cun IA dovr’ins dapli datas e quellas ston vegnir inditgadas. Uschia passentan las persunas che tgiran adina dapli temp al computer.
I saja cler ch'i dat gronds svilups en ils proxims onns era sin il martgà da lavur. Dentant resti difficil da prevair precis tgenins.
