L’impuls per la conferenza ha dà la visita dal president ucranais Wolodimir Selenski il schaner passà tar la presidenta da la Confederaziun Viola Amherd a Berna. Amherd aveva empermess a Selenski d’organisar en Svizra ina conferenza da pasch cun bler paisa.
Sinaquai ha la Svizra manà discurs surlonder cun divers stadis – da la gruppa G7, da l’Uniun europeica sco era cun la China, l’India, l’Africa dal Sid, la Brasilia, l’Etiopia e l’Arabia Saudita. Sin basa dals resuns ha il Cussegl federal uss decidì ils proxims pass, il resun internaziunal saja actualmain avunda grond.
Dus dis sin il Bürgenstock
La conferenza duai dar ina plattafurma per in dialog d’auta qualitad, sur da vias per ina pasch cumplessiva, gista e duraivla per l’Ucraina. Sco il Cussegl federal scriva en sia communicaziun, duai quella succeder sin basa dal dretg internaziunal public e da la charta da l’ONU.
La conferenza è previsa ils 15 e 16 da zercladur sin il Bürgenstock en la Svizra Centrala, sin invitaziun da la presidenta da la Confederaziun Viola Amherd. Preparà vegn l’inscunter tras ina task force dal Departament federal d’affars exteriurs, ed ina gruppa directiva da plirs departaments.
