- La Banca naziunala svizra (BNS) augmenta il tschains directiv per 50 puncts da basa sin 1,5%.
- Las tensiuns en il sistem da finanzas ch'han manà a la surpigliada da la CS entras la UBS, na hajan betg influenzà questa decisiun.
- Uschia è quai gia il quart auzament dal tschains en successiun.
Malgrà las turbulenzas en il sectur da bancas auza la Banca naziunala svizra (BNS) puspè il tschains directiv per 0,50 puncts procentuals sin 1,50%. Cun quest pass vulan ils regulaturs monetars far frunt al squitsch d’inflaziun ch’è anc ina giada s’augmentà. Plinavant na saja betg d’excluder ch’i dovria ulteriurs augments dal tschains per garantir la stabilitad dals pretschs.
La Banca naziunala svizra saja vinavant pronta d’esser activa en cas da basegn al martgà da devisas. Dapi in pèr quartals èn las venditas da devisas stadas en il center.
Cumbat cunter l’inflaziun
L’inflaziun en Svizra è pli bassa ch’en l’Europa u en ils Stadis Unids, ma tuttina memia auta e sto vegnir cumbattida da la Banca naziunala cun ulteriurs pass dals tschains. Uschia è la chareschia puspè s'augmentada marcantamain ils ultims dus mais ed è la finala stada cun 3,4% cleramain pli auta che la procentuala visada da 0 fin 2%. Surtut ils pretschs d’electricitad ed ils pretschs pli auts per viadis aviatics e pauschals èn stads responsabels per l’augment.
Institut d'emissiun american cun avantatg
Sco in dals precursurs da la vieuta politica monetara vala l'Institut d'emissiun american Fed, ch'ha gia augmentà pliras giadas ses tschains directiv. Il tschains directiv dals Stadis Unids è uss tar ina tensiun da 4,75% fin 5%.
Er la Banca centrala europeica (EZB) sa sposta en il fratemp cun ina seria d’augments dals tschains cunter l’auta inflaziun en il territori da l’euro. L’emna passada ha ella auzà il tschains directiv per in 0,5% a 3,5%. Er en la zona da l’euro è la rata d’inflaziun puspè creschida il favrer sin 8,5%. L’october 2022 è vegni mesirà cun 10,6% la pli auta valur dapi che l’uniun monetara exista.
Publicitad n’è betg vegnida engianada
Ils davos dis hai era dà rinfatschas che la Confederaziun, la surveglianza federala dals martgads da finanzas Finma ed era la BNS hajan engianà la publicitad ed la politica.
Malgrà ch’i saja schon la mesemna saira stà cler che la Credit Suisse saja en grondas pitgiras ed vegni a perder sia independenza, ch’ella stoppia fusiunar cun la UBS, hajan la BNS, la Finma ed era il Departament federal da finanzas communitgà ch‘i na dettia nagin privel per la CS.
Thomas Jordan, il president dal directori da la BNS, ha renvià questas rinfatschas e ditg che la publicitad na saja betg vegnida engianada. Las bancas svizras n’ajan praticamain nagin contact cun las bancas regiunalas americanas en la crisa.
Quai che nus avain gì eran consequenzas indirectas che han lura gì consequenzas per la confidenza en il sistem da bancas.
Pir il metter a disposiziun la liquiditad tras la BNS haja fatg pussaivel da chattar ina schliaziun. Sch’ins n’avess betg fatg quai avess ins gì ina situaziun nuncontrollabla che avess fatg enormamain donn.
