Bleras messadis sajan arrivads, uschè blers ch'el haja strusch gì temp per respunder tuts, di Jon Pult, il candidat per il Cussegl federal. Ils dis èn lungs ed in termin chatscha l'auter en quest temp da campagna enfin il di d'elecziuns, ils 13 da december. La pressiun saja gronda e dovria blera lavur da coordinaziun, dentant dettia quai era blera energia.
Jau sun politicher tras e tras ed i fa propi plaschair da pudair far questa experientscha incredibla.
La via maina cun il tren da Cuira a Turitg nua che ils termins èn fixads in suenter l'auter. Tut sto ir si bain. Pult è savens en viadi cun il tren, il bigliet d'auto haja el mai fatg. Quai saja plitost capità uschia en ses giuvens onns, senza gronda intenziun.
Arrivà a Turitg cumenzan las emprimas intervistas gia a la staziun. Dumondas, respostas, fotografias, dumondas, respostas, filmada – e lura – vinavant. In termin chatscha l'auter enfin tar la davosa emissiun tar Tele Züri nua Pult è osp en ina emissiun live.
A mai plascha far politica, era cun las medias.
