Ils parlamentaris e las parlamentarias purilas a Berna n’han anc betg decidì, sch’els prefereschan Beat Jans u Jon Pult per succeder al cusseglier federal Alain Berset. Quai ha ditg il cusseglier naziunal Markus Ritter suenter l’inscunter cun ils dus candidats socialdemocrats.
Las differenzas tranter il candidat dal Grischun e quel da Basilea-Citad sajan però sa mussadas, ha ditg Ritter. La discussiun tgi che survegnia la preferenza da las represchentantas e dals represchentants da l'agricultura cuntinueschian a moda informala.
D’eleger insatgi auter che Pult e Jans na saja stà nagin tema, ha Markus Ritter era ditg. Il mument vegnian bleras variantas discutadas e speculadas. La dumonda saja, sch’i dettia ina dinamica che mainia ad in’autra proposta. Probablamain saja quai il mument anc dal tut avert en las fracziuns.
Tge ch'è stà da discutar
Tenor Markus Ritter è in criteri da l'audiziun stada, sche Jans e Pult sajan pronts da cuntradir al minister d'agricultura da la PPS Guy Parmelin cun uschenumnads cunrapports. Ed i saja er impurtant ch'ils candidats possian «cuntanscher» la populaziun.
Jans e Pult e lur connex cun l'agricultura èn dapi dis tema en las medias. Beat Jans duai sco spezialist da l'agricultura da la sanestra ad avair encunter el la lobby agricula. Sco cusseglier naziunal haja el vulì abolir ils subsidis per animals. E Jon Pult è commember en la suprastanza d'ina fatschenta da PR, ch'ha crititgà rigurusamain la lobby agricula ed il cusseglier naziunal Markus Ritter per l' iniziativa d'aua da baiver netta il 2020.
Reeleger ils vegls
La gronda maioritad da la conferenza purila en il parlament veglia reeleger ils commembers e las commembras actualas dal Cussegl federal, ha Ritter manegià. La conferenza purila è ina gruppa da 40 parlamentaris che vegn manada da Markus Ritter, cusseglier naziunal e president da l'Uniun purila svizra. Betg tut ils purs en il parlament èn da la partida, uschia n'è per exempel il pur da bio Kilian Baumann betg envidà a la conferenza.