Las decisiuns curt e cumpact:
- Mascrinas dovri be pli en il traffic public e las instituziuns da sanadad sco per exempel ospitals e chasas da tgira.
- Persunas testadas positiv ston vinavant ir en isolaziun .
- Questas mesiras valan anc enfin la fin da mars , per pudair proteger persunas vulnerablas. Suenter duai la situaziun normala puspè turnar.
- En butias, restaurants, locals culturals sco er tar instituziuns publicas ed occurrenzas na dovri betg pli mascrinas u certificats .
- Sch'igl è da purtar ina mascrina a la plazza da lavur u sch'igl è vinavant da far homeoffice, decida il patrun. L'obligatori da mascrina è abolì, sco er la recumandaziun da far homeoffice.
- Las novas mesiras valan a partir da gievgia, ils 17 da favrer 2022.
La situaziun epidemiologica sa sviluppia vinavant a moda positiva. Grazia a la gronda immunitad en la populaziun, saja betg probabel ch'il sistem da sanadad vegnia surdumandà, malgrà ch'il virus circuleschia il mument ferm. Perquai è il Cussegl federal da l'avis ch'i saja giustifitgà da turnar a la normalitad. Cun sia decisiun è il Cussegl federal suandà la maioritad dals chantuns.
Questas mesiras vegnan abolidas:
- L'obligatori da mascrinas en butias ed en l'intern da restaurants sco er en instituziuns publicas, manaschis u tar occurrenzas.
- L'obligatori da mascrinas a la plazza da lavur.
- L'entrada cun certificat (regla da 3G, 2G e 2G+) en instituziuns publicas sco kinos, teaters u restaurants sco er tar occurrenzas.
- L'obligatori da lubientscha per occurrenzas grondas.
- Limitas per inscunters privats.
Er las limitas da capacitads per il commerzi en detagl, pia en butias ed er tar pendicularas vegn schlià.
Recumandaziun da homeoffice vegn stritgada
L'Uffizi federal da sanadad stritga plinavant er la recumandaziun da homeoffice. Dentant resta il patrun responsabel per la protecziun. Quai munta ch'il patrun sto decider davart il purtar mascrina a la plazza da lavur u er sch'i duai vinavant vegnir lavurà da chasa anora. Plinavant restan vinavant las reglas per proteger persunas ch'èn periclitadas spezialmain enfin la fin da mars.
Quai resta anc fin la fin da mars
Perquai ch'il virus circulescha anc adina ferm en la populaziun e po anc adina chaschunar decurs severs, ha il Cussegl federal decidì da mantegnair la situaziun speziala fin la fin da mars. Tut tenor il decurs da la pandemia possian questas mesiras er vegnir abolidas pli baud.
Persunas testadas positiv per Covid-19 ston vinavant restar per 5 dis en isolaziun. Uschia possia vegnir evità che persunas ch'èn potenzialmain fitg contagiusas, infecteschan autras persunas. Plinavant vegn er l'obligatori da mascrinas mantegnì per il traffic public ed en instituziuns da sanadad – cun excepziun dad abitantas ed abitants da chasas da tgira e da vegls.
Ils chantuns han vinavant la libertad da decider mesiras pli severas u da liberar tschertas instituziuns da l'obligatori da mascrinas. Er singulas instituziuns pon decider che visitaders e visitadras ston purtar ina mascrina – per exempel la pratica d'in medi da chasa u in salun da coiffeur.
Fin da la situaziun speziala – il prim d'avrigl
L'ordinaziun da Covid-19 reglescha anc fin la fin da mars l'isolaziun e l'obligatori da mascrinas en il traffic public e las instituziuns da sanadad. Sche la situaziun epidemiologica lubescha, vegn l'ordinaziun il prim d'avrigl ord funcziun. Cun quai suonda lura er il return en la situaziun normala.
Vinavant en funcziun restan las regulaziuns che sa basan sin la lescha d'epidemia (per exempel il traffic da persunas internaziunal u ils custs che la Confederaziun po surpigliar per medicaments). Er vinavant en funcziun restan las regulaziuns per ils certificats u ils custs per tests, che sa basan sin la lescha da Covid-19.
Certificats cumpatibels per l'UE restan vinavant
Damai ch'ins na dovra betg pli certificats en Svizra, na vegnan er tschentads or nagins certificats pli ch'èn be valaivels en Svizra. La Svizra tschenta dentant vinavant or certificats valaivels per l'entira Uniun europeica. Damai ch'ils auters pajais èn independents e pon decider sez co ir enturn cun las mesiras, quinta la Svizra ch'ins dovra vinavant certificats en auters pajais.
Ils chantuns han vinavant la pussaivladad dad ordinar, sche giavischà, in obligatori da certificats.