Ins veglia proteger las persunas vulnerablas che sa chattan en instituziuns da sanadad, sajan quai chasas da tgira u ospitals. Las instituziuns da sanadad dumandadas prefereschan perquai da schluccar succesivamain las mesiras. Entschatta favrer ha il Cussegl federal tramess en consultaziun duas variantas. L’emprima prevesa d’abolir tuttas mesiras sin in plum, la segunda da schluccar en dus pass.
Ch’il dumber d’ospitalisaziuns crescha cura che las mesiras da corona vegnan schluccadas, na crai il schefmedi da l’ospital regiunal Surselva, Marcel Bundi, betg. Perquai na tema el er betg las schluccadas. Però accentuescha el ch'ospitals stoppian sa tegnair il pli ditg vid las mesiras per proteger la pazientas, pazients sco er il persunal.
Da quai avis èn er las chasas d’attempads dumandadas. Claudia Tomaschett che maina la chasa da vegls e da tgira a Glion sa mussa precautamain optimistica. Ed er ella na quinta betg cun grondas schluccadas per las chasas da tgira.
Ins na po anc betg propi sa fidar da la chaussa. Nossas cussadentas e noss cussadents èn pli periclitads. Da quai anora stuain nus esser pli precauts che glieud pli giuvna.
Er il directur dal Center da sanadad Engiadina Bassa, Joachim Koppenberg, na vul betg desister d’in di a l’auter da tuttas mesiras. Per exempel duai l’obligatori da mascrina valair pli ditg en talas instituziuns da sanadad che insanua auter.
En general sentan ins ina tscherta malsegirezza. Plans a lunga vista na paran las chasas da tgira betg da far suenter las experientschas dals ultims dus onns.
Pli grondas sfidas che quai che nus avain gì ils ultims dus onns na datti betg.
