Il Cussegl federal haja bain prendì las mesiras necessarias, ma la Svizra na saja nagina insla, uschia Sommaruga envers la «SonntagsZeitung». Nagin possia garantir ch'i dettia adina avunda gas per tuts. La Svizra stoppia perquai urgentamain vegnir davent da la dependenza da gas. Tgi che possia uss anc remplazzar ses stgaudament da gas duaja far quai. La ministra d'energia appellescha perquai als chantuns dad anc investir dapli en energia solara, idraulica e da vent. Per rinforzar la segirtad dal provediment haja il Cussegl federal decidì da stgaffir ina reserva da forza idraulica sin l'enviern.
Actualmain stgaudan en Svizra radund 300'000 chasadas cun gas. Sch'i vegniss tar ina mancanza vegniss l'energia l'emprim raziunada tar il commerzi e l'industria. Las chasadas vul il Cussegl federal schanegiar il pli ditg.
