Las 21:00 resuna il zain dal Munot tras la citad veglia da Schaffusa. E mintga di vegn «Il Munotglöckchen» sunà a maun. Pli baud era quai il signal per serrar las portas da la citad. Da quella giada vegniva sunà durant 15 minutas il zain. Oz vegn il zain anc sunà a maun, ma be per tschintg minutas. Da far quai tutga tar la lezia da la guardiana da la fortezza. Otg onns è quai stada Karola Lüthi. Envers Radio SRF ha ella ditg ch'i dovria disciplina da sunar mintga di il zain.
Ins è adina lià las sairas.
Uschia ha ella mintgatant manchentà ina ni l'autra saira cun festas da famiglia ni amis. Sin quellas saira sa legra ella en la pensiun. La fin d'avrigl sto ella bandunar la fortezza. Dentant era sche ella sa legra sin las sairas da cumpagnia vegn la fortezza a mancar a Karola Lüthi. Oravant tut era sco lieu d'abitar. Da vesair giu sin la citad da Schaffusa era in privilegi, ha ella ditg envers Radio SRF. Dad ir uss en ina abitaziun nua che la vista è in'autra saja in pass ch'ella na fetschia betg uschè gugent.
Viver e lavurar en la fortezza saja insatge unic. Dasper sunar il zain tutga tar las lezias era da pavlar ils tschiervs sin l'areal o far guidas cun turistas e turists en il Munot.
Karola Lüthi era l'emprima dunna ch'ha surpiglià il post da la guardiana da la fortezza. Ella ha mintga di sunà il zain cun excepziun dad in di. Ils 14 da zercladur 2019, il di da chauma da las dunnas n'ha ella betg sunà il zain. Igl è l'emprima giada dapi tschientaners che quel n'è betg vegnì sunà. Quai ha procurà per grondas discussiuns a Schaffusa.
En paucs dis suna Karola Lüthi per l'ultima giada il zain. Lura surpiglia sia successura Sabine Hinz. Ella va ad abitar en la fortezza cun sia famiglia.