La blera plievgia dals davos mais è benedicziun e smaladicziun il medem mument per las vignas. Bain han las ivas pudì crescher fitg grazia la plievgia, l'aura bletscha lascha dentant era sa derasar malsognas da bulieus sco la ruina. Anc n’hai betg dà gronds donns en las vignas, ma il privel, lez è grond. Per cumbatter ils bulieus vegnan las vignas perquai sprizzadas regularmain. Quai che saja dentant gnanc uschè simpel il mument, di Jürg Bachofner da l’Associaziun dals viticulturs da la Svizra tudestga. «Gist en in tal onn, nua che nus avain ussa gì passa 60 dis plievgia, èn ils funs lomiads e fan grev dad ir cun maschinas.»
E perquai sajan las dronas in grond agid. Quellas pon era en zonas spundivas e taissas lavurar spert ed effizient. La tecnologia haja fatg gronds pass ils davos onns, di Bachofner.
Quai funcziunescha pli u main automatic. La drona memorisescha ils cunfins da la vigna e sa era nua ch’ella ha interrut il sprizzar e cuntinuescha lura là. Da vart da la tecnica funcziunescha quai fitg bain.
Tar Agroscope, il center da perscrutaziun en l'agricultura da la Confederaziun hai num sin dumonda che las dronas sajan in'interessanta tecnologia per la viticultura. Ins possia uschia, almain per part, renunziar sin lavur manuala stentusa e las persunas che lavuran en la vigna sajan era exponidas pli pauc a las substanzas che vegnan sprizzadas.
Nagina reducziun gronda da pesticids
En il fratemp hajan els dentant era vesì che las dronas na possian betg remplazzar dal tut la lavur persunala vi da la vit. Quai di Pierre Henri Dupuis ch'è tar Agroscope responsabel per il cumbat cunter malsognas.
La drona sprizza da surengiu sin las vits e perquai èsi grev da cuntanscher la part sut da las ivas. Per cuntanscher ina buna protecziun èsi perquai impurtant da sprizzar almain ina u duas giadas dal sulom las ivas.
Ed er in'autra spetga n’è betg sa verifitgada. Avant intgins onns vegniva ditg che las dronas possian era reducir il diever da pesticids e fungicids en las vignas. L'experientscha mussia ussa che quai na saja betg exnum il cas, di Dupuis. «Il dosagi è medem tar las dronas. La differenza è la quantitad d’aua. Lezza è reducida, ma la quantitad da pesticid è la medema.»
Malgrà quai è el persvas che la viticultura vegnia pli e pli fitg a duvrar las dronas per cumbatter malsognas e survegliar las vits. Ils avantatgs sajan gronds e la tecnologia fetschia gronds svilups.
