L'amur per animals selvadis chaschuna mintgatant conflicts cun la lescha, uschia per exempel en la citad da Turitg. Là èsi dapi circa dus onns scumandà da pavlar las columbas. Quellas fan numnadamain donns, saja quai cun lur ignivs en nischas da bajetgs u cun lur excrements. Quels cuntegnan acid urinal d'uschè in’auta concentraziun ch'i po perfin dar donns vi dal lac d'autos.
La pli gronda part da la glieud sa tegnia vi dal scumond, di il guardiaselvaschina da Turitg, Christian Breitler – ma i dettia er auters. Durant la notg s'inscuntrian commembers da gruppas per la protecziun d'animals e pavlian las columbas. Per part sternian quels plirs kilos pavel. Sch'in d'els vegnia traplà e survegnia ina multa, lura repartian els quella a moda solidarica tranter ils commembers e pajan ils circa 200 francs ensemen, declera Christian Breitler. D'agir cunter ils responsabels da questas acziuns da guerriglia saja perquai gnanc uschè simpel.
Nus pudain bain dar multas, ma quai n’è betg nossa lavur principala. Nus n'essan betg avunda persunas e quai è l’incumbensa da la polizia da la citad.
La polizia da la citad dettia dentant mo darar multas ad insatgi che pavli animals selvadis. Durant l’emprim onn dal scumond, il 2023, èn quai stadas quatter multas – l’onn passà sis. E dapi l'entschatta da quest’onn ha la polizia dà duas multas sco quai ch’ella scriva.
Discurs ed empruvar da declerar pertge ch'i na saja betg bun da pavlar las columbas na gidian tar quella glieud nagut, declera Christian Breitler. Tenor el èsi propi in grond problem sche persunas pavlan las columbas malgrà scumond. Dapli ch'i vegn pavlà e dapli columbas ch'i dettia en la citad. Quai muntia ch'els stoppian lura la finala sajettar dapli columbas – quantas na vul el betg tradir.
Uschè u uschia èsi per ils amis da las columbas, sco per exempel l'uniun «Stadttuube» eticamain sbittaivel da sajettar columbas. Ord vista da l'uniun n’èn las columbas numnadamain nagins animals selvadis, mabain derivadas da las columbas da posta. Tomislav Obradovic, il president da l'uniun manegia perquai:
Da scumandar da pavlar n’è betg ina soluziun. Ils animals na survegnan uschia betg il dretg pavel.
Tenor l'uniun dovria en las citads svizras simplamain dapli chasets da columbas. En la citad da Turitg datti actualmain trais, quai na tanschia dentant betg, di l’uniun.
Il parlament da la citad da Turitg ha l’onn passà approvà ina moziun che pretenda ina schliaziun favuraivla als animals per il problem da las columbas. La regenza n’ha dentant anc betg prendì mesiras.
Or da l'archiv:
Era la citad da Cuira è gia stada cunfruntada cun in turment da columbas, sco RTR ha rapportà il 2014.