Ellas èn omnipreschentas. Nus chattain ellas en il telecumond, en il telefonin ed er en ils autos electrics – las battarias. Senza ellas na fiss il svilup tecnologic betg là nua ch’el è oz. Ed ellas daventan adina pli impurtantas, per exempel era per la rait d’electricitad. Là duain ellas garantir la stabilitad da la rait electrica. Ed ina da quellas battarias immensas duai vegnir construida en in nov center da tecnologia a Laufenburg en il chantun Argovia, declera Marcel Aumer, il schef e confundatur da l’interpresa «Flag Space» che vul realisar quai center ils proxims onns.
Cun la midada energetica cun dapli energia solara, indrizs cun pumpas da stgaudar ed autos electrics avain nus adina fluctuaziuns en la rait. Cun ina battaria pon ins stabilisar quai.
Concret munta quai per exempel che sch’i dat fitg bler sulegl ed ils panels solars produceschan dapli electricitad che quai ch’i vegn duvrà, lura vegn quel surpli d’electricitad arcunà en la battaria e po lura vegnir duvrà pli tard. Spezial è tar la battaria planisada a Laufenburg ch’i na sa tracta betg dad ina construcziun che sa basa sin litium sco quai che nus avain per exempel en noss telefonins, mabain dad ina battaria da redox flow. Ina da las cumponentas principalas – aua. I na dettia tar questa sort battaria nagin privel ch’ella pudess brischar u perfin explodir, ultra da quai possian ins reciclar tut las cumponentas, hai num da la firma Flex Base che vul construir la battaria. Ed anc insatge è spezial: La battaria a Laufenburg saja la pli gronda dal mund, accentuescha Marcel Aumer.
Nus pudain guardar en l’internet e cumparegliar tge ch’è il mument en funcziun u era planisà. Nagut è cumparegliabel.
Il bajetg da la battaria planisada a Laufenburg ha ina lunghezza da 170 meters, ina ladezza da 80 meters ed ina autezza da 30 meters. Cun quai curclescha il bajetg la surfatscha da duas plazzas da ballape. Dimensiuns impressiunantas.
Ma quitads na fa als iniziants betg la surfatscha, mabain l’autezza dal bajetg. En la zona d’industria, là nua ch’il center da tecnologia duai vegnir construì, lubescha l’urden da construcziun e d’utilisaziun mo bajetgs da maximalmain 20 meters. I dovra pia ina lubientscha speziala. E quella vul la citad da Laufenburg era dar.
Avant sis onns ha la Swissgrid, la gestiunaria da la rait da transmissiun svizra bandunà sias localitads che sa chattavan gist là nua ch’il nov center da tecnologia duai en paucs onns avrir las portas. Per la citad saja il project perquai da grond’impurtanza, di Herbert Weiss, il president da la citad da Laufenburg.
Perquai che la Swissgrid ha bandunà Laufenburg avain nus gì ina gronda reducziun da las entradas da taglia. Ussa essan nus fitg cuntents e leds ch’ina fatschenta nova prenda dimora tar nus.
E signals positivs dettia era da la populaziun, di Weiss. La fin da november decida lezza a l’urna. Di lezza Gea pon las lavurs bainprest entschaiver. Sut il stritg vai per investiziuns da pliras milliardas francs, tradescha Marcel Aumer.
