Passa 160 meters lunga e da quai da 70 meters lada è la plantascha sut vaider. Ed endadens la serra – tut verd. Verd da plantas da cannabis. Qua sin in bain puril a Ried sper Kerzers ha Stefan Strasser fundà avant set onns l'interpresa Swissextract. Lur spezialitad – products da cannabis.
Il cannabis è ina planta multifara ed ha blers avantatgs per l’agricultura.
Il chonv – cannabis è il num latin – possian ins duvrar per differentas chaussas. Per sugas, ieli, products da cosmetica u era sco med enivrant. La fatschenta da Swissextract haja cumenzà cura che la Svizra ha legalisà products da CBD. Quai èn products da chonv che cuntegnan mo pauc u insumma nagin THC, quella substanza che procura per l’effect enivrant.
E cura che la Confederaziun ha lubì emprovas da pilot scientificas cun cannabis legal èsi stà cler per Stefan Strasser ch'el vul esser da la partida. En il fratemp creschan en sia plantascha diesch differentas sorts da chonv, cun bler u era pauc THC. Quella diversificaziun saja impurtanta perquai che betg mintgin veglia consumar in cannabis cun bler THC.
Ils tests han la finamira da stgatschar il martgà illegal. Mo quel è fitg agil e producescha adina novs products. E perquai dovri uschè bleras sorts.
Swissextract furnescha ses cannabis dal Seeland a trais projects da perscrutaziun. In a Basilea e mintgamai in en la citad ed en il chantun da Turitg. En tut datti il mument set projects, nagins en il Grischun.
A Ried vegn il chonv plantà, cultivà e racoltà a maun. El vegn testà en in labor e suenter pachetà e tramess a las apotecas che vendan il cannabis als participants e participantas dal studi.
Cunquai che l'interpresa lavura cun in product ch'è atgnamain illegal sto Swissextract era garantir ch'il chonv na crodia betg en mauns fallads e ch'i na vegn betg rut en ed engulà. Ins haja perquai prendì las mesiras necessarias, di Stefan Strasser.
Nus essan en stretg contact cun il BAG e la polizia. Tut vegn surveglià cun cameras. Nus savain exact tgi che va en ed ora.
Ultra da quai saja mintga planta registrada e possia uschia vegnir controllada. E suenter la racolta vegnia adina puspè pasà e controllà sche tut è anc qua. Mintga singula flur possia uschia vegnir suandada, quai era per garantir che nagin collavuratur u osp na possia laschar svanir insatge.
Circa ina tonna cannabis scumandà producescha Swissextract mintg'onn per ils trais projects da pilot e venda quel per il medem pretsch sco sin la fiera illegala, vul dir per circa diesch francs per gram. Dat ina svieuta da circa diesch milliuns francs. Mo ritgs na sajan els anc betg daventads cun quella fatschenta, di Strasser.
Nus avain investì fitg blers daners en ils projects da pilot. Durant tschintg onns avain nus perscrutà e durant quest temp n’avain nus betg pudì vender in gram. Oz èn quai bain plirs tschient kilograms, ma cumpareglià cun la producziun legala da chonv cun CBD anc adina ina pitschna part.
Mo forsa che quai sa mida en intgins onns. Tut tenor ils resultats dals studis e co la politica federala valitescha il cannabis en l'avegnir, pudess il «kiffar» daventar legal en Svizra. Stefan Strasser e sia interpresa Swissextact crain en tutta cas londervi. Els han gia cumenzà a bajegiar ina serra pli gronda.
