Sche la polizia chatta tar insatgi cocain u heroin vegnan las substanzas confiscadas e destruidas. Il Tribunal federal ha uss decis che pitschnas quantitads da cannabis stoppian vegnir returnadas al possessur.
Il cas ch’ha manà a questa decisiun è capità il 2019 a la staziun da St. Margrethen. Durant ina controlla da persunas ha la polizia chattà tar in um 3,3 grams ed ha confiscà las drogas. L’um è lura sa dustà fin avant il Tribunal federal. Quel ha ussa dà raschun ad el. La polizia sto returnar ad el las substanzas.
Tenor il pledader da medias da la Polizia chantunala grischuna, Markus Walser, na haja en il Grischun anc betg dà in cas sumegliant.
Nus n’avain registrà nagin cas sumegliant tar nus en il chantun. La lavur da la Polizia chantunala sa drizza però tenor las decisiuns federalas e nus avain instradà novs process tenor questa decisiun.
Il possess d'ina quantitad fin a 10 grams cannabis è lubida en Svizra e na vala betg sco malfatg. Il consum u la vendita percunter vala sco delict e vegn chastià. En cas simpels cun ina multa, en cas pli severs cun ina denunzia penala.
L’ultima votaziun dal pievel davart la legalisaziun dal consum da cannabis è stada l’onn 2008. Là han 63,7% decis cunter il permiss da consum. L’onn 2012 ha il parlament decis d’instruir in model da chastis ed il 2017 permess il possess fin a 10 grams per l’agen basegn.
