Cun lur grugn stgavan els en il terratsch per chattar insatge da magliar, qua en quest guaud a Zollikon al Lai da Turitg. Cunzunt ina chaussa – la chagliamorta da Henry. Ina neofita che cuvra pli u main tut la surfatscha da dus enfin trais hectaras, quai che correspunda circa a trais plazzas da ballape.
Christian Wiskemann, il manader da project da l’organisaziun «Naturnetz Pfannenstil», declera la situaziun.
I sa derasa dapertut. D'ina vart creschan las plantas ad aut, 15 fin 20 meters, da l'autra vart er per lung dal terren, dapertut.
Quai era la situaziun avant dus onns. Dapi lura è bler sa midà. Quai era grazia al pur Nils Müller e ses animals. Ils portgs da la razza Turopolje, ina maschaida d'in portg da chasa ed in portg selvadi, sajan gia avant stads en acziun. Per exempel tar in puz ch’era creschì en. Ed era suenter quest'acziun en il guaud a Zollikon è la bilantscha fitg positiva, di Nils Müller.
Ils bostgs restan e sin il terren èn tut las plantas da la chagliamorta semperverda davent. Suenter è quai sco in er, preparà per ils sems dals bostgs e da las plantas indigenas.
Betg mo la flora profitescha, era ils portgs han tenor Nils Müller grond gust. In tal prà en il guaud saja per ils portgs natiralmain in lieu bler pli interessant ed adequat ch'ina stalla. Quai saja propi ina situaziun da win-win.
Il pur Nils Müller e tut ils responsabels dal «Naturnetz Pfannenstil» tiran entant ina bilantscha fitg positiva. Il chantun Turitg è ussa vi d'evaluar il project e decida lura, sch'ils portgs dastgan era vegnir en acziun en auters guauds da la regiun.
